1936 онд 4000 гаруй гүйлтийн тамирчид Грекийн Олимп уулнаас орчин үеийн Олимпын анхны бамбарыг барин Германы Берлин хотыг зорьж байжээ. Тун энгийн хийцтэй, үр ашигтай энэхүү бамбарыг ерөнхийд нь "Цэвэр Герман бүтээл” гэж тодорхойлдог.
 
Харин үүнээс хойш 80 жилийн дараа гэхэд Олимпын бамбар бэлгэдлийн шинж чанараа алдаагүй ч, загвар хийц нь дөрвөн жил тутамд өөрчлөгдсөөр. Ирэх жил болох Риогийн олимпын бамбарыг 12,000 гаруй хүн Бразилын хот, тосгодоор барин гүйх юм.
 
Бразилын Chelles & Hayashi Design студийн загварыг нь бүтээсэн бамбар харахад энгийн цагаан өнгөтэй, саваа мэт боловч 60 сантиметр урт, дөрвөн сантиметр өргөнтэй энэ бамбар "энгийн” бас биш ээ.

 
Хоёр тамирчин бамбарыг дамжуулах үедээ товч дарах бөгөөд тэр үед бамбарын орой хэсэг дээш сунаж, завсраар нь таван өнгийн туузнаас гэрэл цацарна. Таван өнгийн хамгийн доор байрлах хар өнгийн тууз нь Копакабана дүүргийн зам харгуйг, хоёр цэнхэр тууз нь далай, тэнгисийг, ногоон тууз нь Рио хотын уул толгодыг, шар тууз нь нар болон хамгийн шилдэг тамирчдад олгох алтан медалийг бэлгэдэж байгаа аж.

Эх сурвалж: