Хэдэн жилийн өмнө "Буян"-ийн Жагаагийн хэлсэн үг байдаг юм. "Нэхийний үнэ өсөөд л байна. Цаад хэдэн хятадууд чинь малчидаас үнэ цохиж авсаар үндэсний хэдэн нэхийний үйлдвэрийг нь дампууруулж хаячихаад, хамаг тоног төхөөрөмжийг нь зөөчихнө. Та нарыг дараа нь гуйгаад ч тоож авахгүй /Нэхийний үнэ 40 мянган төгрөг хүрч байсан үе/" гэж билээ.

Тэр үг наадмаар биеллээ олох шиг боллоо. Бүхэл бүтэн нас бие гүйцсэн хониний нэхийг өлөнтэй нь 500 төгрөгөөр авч байх жишээтэй.

Тэгвэл энэ түүх ноолуурын салбарт давтагдах суурь нь тавигдлаа. Учир юу гэвэл цаана чинь ноолуурын үнэ унаад эхэллээ. Жил бүрийн хавар малчид ноолуураа тушаан, бэлэн мөнгөтэй золгодог. Гэтэл намар их дээд сургуулиудад төлөх хүүхдийн сургалтын төлбөр, банкны зээл зэргээ ноолуураас олох орлогоороо хаахаар төлөвлөсөн олон малчин өрхөд энэ байдал хамаатай.  

Ноолуурын үнэ аймаг бүрт харилцан адилгүй байдаг.

Өнгөрсөн дөрөвдүгээр сард нэг кг ноолуурын үнэ Говь-Алтай аймат хамгийн хямд буюу 30 000, Архангай, Хөвсгөл аймгуудад хамгийн өндөр буюу 57 000 төгрөг байсан юм. Харин тавдугаар сард байдал өөрчлөгдөн, Архангай, Хөвсгөл дэх үнэ 55-56 мянга болон буурч, Говь-Алтай аймгийн үнэ 40 мянга болж өсчээ.

Өнгөрсөн онд оргил үедээ буюу 80 мянгад хүрсэн ноолуурын дундаж үнэ ийнхүү аажмаар буурч, энэ сарын эхээр Баянхонгорт хамгийн өндөрөөр буюу 57 мянгаар үнэлэгдэж, Говьсүмбэрт 25 мянга хүртлээ буураад байна.