Монгол улсад өвлийн аялал жуулчлалыг хөгжүүлэх, аялал жуулчлалын улирлын хугацааг уртасгах, эко аялал жуулчлал хөгжүүлэхэд хувь нэмэр оруулах зорилготойгоор Хөвсгөл аймагт жил бүр мөсний баяр зохион байгуулдаг билээ. Үзэсгэлэнт Хөвсгөл нуурын гайхамшгийг мөсөн урлагаар бүтээж, мөсөн хотхоныг Хөвсгөл нуурын мөсөн дээр барьж олон нийтэд үзүүлдэг юм. 
16 дахь жилийн мөсний баяр "Хөх сувд-2016” энэ сарын 3, 4-ны өдрүүдэд Хөвсгөл аймгийн Хатгал тосгоны Доод Модот буланд болно. Ерөнхий зохион байгуулагчаар Хөвсгөлийн аялал Жуулчлал эрхлэгчдийн холбоо ажиллаж байгаа юм байна.

Дугуйн холбоо болон олон улсын Загасчлалын холбоо мөсний баярын арга хэмжээнд нэгдэж  шинэ тэмцээн уралдааныг зохион байгуулж байгаагаар онцлог ажээ.  Хөвсгөлийн өвлийн үзэсгэлэнт байгалийг нийтэд сурталчилан таниулах, хамгаалах, орон нутгийн иргэдийн орлогыг дэмжих, эко аялал жуулчлалыг хөгжүүлэхэд хувь нэмэр оруулах уг мөсний баярт ерөнхийлөгч Ц.Элбэгдорж оролцох юм. 

Өнөөдрийн байдлаар Хөвсгөл нуурын мөс 90 орчим см зузаан хөлдсөн байна. 80-100 см зузаан хөлдсөн тохиолдолд мөсөн тээвэр хийхийг зөвшөөрдөг ажээ. Мөсний баярын аюулгүй байдал, зохион байгуулалтын асуудлыг орон нутгийн мэргэжлийн байгууллагууд  хариуцах юм байна. Өнгөрсөн жил гадаад дотоодын 1400 орчим жуулчид мөсний баярт оролцож байсан бол энэ жилийн тухайд мөн ийм хэмжээний жуулчид оролцох мэдээтэй байна.