Европын хөлбөмбөгийн холбооны хамгийн нэр хүндтэй тэмцээн Аваргуудын лигийн шувтаргын тоглолт өнгөрсөн шөнө явагдлаа. 

 

Италийн алдарт Сан Сиро цэнгэлдэхэд болсон тус тоглолтод Испанийн эзэн хааны Реал Мадрид клуб мөнхийн өрсөлдөгч, нутаг нэгт Атлетико Мадрид клубийг 11 метрийн торгуулийн цохилтоор буулган авсан юм.

Тоглолтын 15 дахь минутад Гарэйт Бэйлийн дамжуулалтаар Серхио Рамос оруулсан бол 79 дэх минутад Феррейра Карраско чухал гоол оруулснаар тоог тэнцүүлж чадсан. Гэвч хоёр баг нэмэлт цагт гоол оруулаагүй бөгөөд торгуулийн цохилтыг Атлетико алдаж, реалчууд төгс гүйцэтгэснээр Эзэн хааны баг Европын хамгийн нэр хүндтэй тэмцээнд 11 дэх удаагаа түрүүлсэн юм.

Испанийн хэвлэлүүд болоод Европын спортын хэвлэлүүд энэхүү ялалтыг домогт хөлбөмбөгчин, өдгөө Реалын ахлах дасгалжуулагч Зинаде Зидантай салшгүй холбоотой хэмээн бичиж байна. Тэрбээр финалын тоглолтын дараа "Манай багийн бүх тоглогчид өнөөдөр хүссэн хэмжээндээ тоглож чадлаа. Атлетико бол хэзээд бидний хэцүү өрсөлдөгч байсаар ирсэн. Гэвч бид энэ удаад илүү байж чадсан. Баярлалаа та бүхэнд" хэмээжээ.