Сонгууль дөхөж байхад МАХН-ын гишүүд Н.Энхбаяраас нүүр буруулж эхэллээ
МАХН-ын дарга Н.Энхбаяр тэргүүтэй 14 хүн өнгөрсөн өдрүүдэд нойтон өлсгөлөн зарлаж, даваа гарагийн орой зогсоосон юм. Учир нь Сонгуулийн Ерөнхий хороо тус намаас нэр дэвшигчдийн бичиг баримтыг хүлээн авсанаар ийнхүү өлсгөлөнгөө зогсоосон юм.
Тэгвэл МАХН-ын нэр бүхий гишүүд мэдээлэл хийж, намын гишүүнчлэлээсээ албан ёсоор татгалзаж буйгаа мэдэгдлээ. Тодруулбал, Н.Энхбаяр дарга өлсгөлөн зарлан улс төрийн шоу хийж байгаа тул дүүрэг бүрийн төлөөлөл болсон МАХН-ын 40 гаруй гишүүн намаасаа гарч байгаагаа мэдэгдсэн юм.
Тэд хэлэхдээ "Иргэн бүр Үндсэн хуулиар олгогдсон сонгогдох, сонгох эрхээ дөрвөн жилд нэг удаа эдэлдэг. Гэтэл улс төрийн ууган хүчний нэг МАХН ард түмнийхээ сонгох эрхэнд ноцтой халдаж байна. Учир нь иргэд төр түшилцэх хүнээ хуулийн дагуу сонгуулийн аргаар сонгох ёстой. Гэтэл Н.Энхбаяр өлсгөлөнгөөр сонгуульд орох эрх олж авах гэж тэмцлийн хурц хэлбэрийг сонгож 66 цаг намын гишүүдээ өлсгөлөө. Өнөөдөр Монголчуудын амьдрал доройтож ард түмэн амьжиргаагаа залгуулж чадахгүй өлсөж байхад МАХН-ынхан төрийн эрхийг авахын төлөө өлслөө. Өлсгөлөн зарлана гэдэг 1990-д онд ардчилал авчирсан түүхэн сонголт байсан. Тэр сонголтоор Монголын ард түмэн өнөөдрийн сонгох, сонгогдох эрхээ олж авсан. Харин өнөөдрийн Н.Энхбаярын өлсгөлөн ард түмний ард түмний олж авсан эрх чөлөөнд халдаж байна. Өлсгөлөн бол тэмцлийн хурц хэлбэр. Зөвхөн өөрийн эрх ашгийн төлөө намын гишүүдийн амь насанд халтай тэмцлийн хурц хэлбэрийг сонгож, МАХН-аас нэр дэвшиж байгаа л бол өлсгөлөнд оролцох ёстой гэж хүмүүсийг хүчлэн өлсгөлөнд оролцуулснаас болж хэд хэдэн хүний биеийн байдал муудаж, өлсгөлөнгөө зогсоолоо.
Энэ талаар МАХН-ын гишүүн Ж.Оюунцэнгэл "25 жил энэ намтай хамт явсан ч гэсэн сонгуулийг өлсгөлөнгөөр эхлүүлж байгаад Монгол эмэгтэй хүнийхээ хувьд гундуу байна. Албан тушаал, эрх мэдлийн төлөө биш улс орон, үр хүүхдийнхээ төлөө ажиллаж, МАХН-аас албан ёсоор гарч байгаагаа мэдэгдэж байна. Өнөөдөр миний сонсож байгаагаар 40-50 хүн МАХН-аас гарч байгаа. Нам сонин биш байна” хэмээв.