Хар зах дээр 13,8 сая доллароор үнэлэгдэх 90 гаруй кг кокаиныг Шри Ланк улсын тусгай албаныхан илрүүлэн хураан авчээ. Энэ тухай тус улсын Төрийн удирдлага, дотоод хэргийн яам мэдээллээ.

 

Ийм их хэмжээний хар тамхийг Бразилаас тээвэрлэн авчирсан элсэн чихэр бүхий ачааны чингэлэг дотор хэд хэдэн аяны цүнхэнд хуваан хийсэн байсныг тагнуулын нууц мэдээлэгчдийн тусламжтайгаар илрүүлсэн байна. 

Үүнээс өмнө дөрөвдүгээр сард Шри Ланкийн Коломбо боомтод орж ирсэн Ираны загас агнуурын хөлөг онгоцон дотор хар зах дээр 7,5 сая доллароор үнэлэгдэх 110 кг героин байсныг илрүүлж байжээ. Шри Ланкийн тусгай албаны үзэж байгаагаар, хар тамхийг их хэмжээгээр зөөвөрлөх болсон нь мафийнхан Коломбо боомтыг Европ, Азийн орнууд руу хар тамхи гаргадаг дамжин өнгөрүүлэх төв болгохоор санаархаж буйн илрэл ажээ.

Шри Ланк улсын Ерөнхийлөгч Майтрипала Сирисена чингэлгийн терминалд өөрийн биеэр хүрэлцэн очиж, хар тамхийг илрүүлэх тусгай ажиллагаанд оролцсон хууль сахиулах байгууллагуудын ажилтнуудад баяр хүргэсэн байна.