Нийтийн тээврийн үйлчилгээнд явж буй микронуудын насжилт дууссан учир энэ ондоо багтаж шугамнаас хасахаар болсон. Тэгвэл тухайн микро автобусуудыг өчигдрөөс эхлэн үйлчилгээнд явуулахгүй байх шийдвэрийг гаргасан нь иргэдэд бухимдал төрүүлж, эсэргүүцэхэд хүргээд байна. Захын алслагдсан гэр хороололуудын чиглэлд микро автобус 500-1000 төгрөгөөр явдаг. Гэтэл үйлчилгээнд явуулахгүй байх шийдвэрийг гаргасан буруу шийдвэр гэж үзэх иргэд олон байна. Учир нь том оврын автобуснууд орой 22.00 цаг хүргээд зогсдог, тэрнээс хойш орой үдэш ажил нь тардаг иргэд яаж гэртээ харих юм. Гэтэл микро автобуснууд шөнийн 00 цаг хүртэл чөлөөтэй явдаг.

Хэрвээ микрог явуулахгүй шийдвэр гаргасан бол том оврын автобуснуудынхаа цагийг сунгах ёстой. Тэднийг 00 цаг хүртэл явуулдаг байх ёстой гэж иргэд ярьж байна.

Микроны оронд явуулах унаагаа шийдэж чадаагүй байж, тэднийг шугамнаас хасч ард иргэдийг хохироож болохгүй гэдгээ ч иргэд учирлаж байна. Өчигдрөөс эхлэн зарим чиглэлд микронуудыг огт харагдахгүй болж цөөрсөн нь илт харагдаж байв. Уг нь 12-оос дээш жил ашиглаж, насжилт нь дууссан 171 микро автобусыг үйлчилгээнээс хасах юм байна. Харин том оврын автобустай чиглэл давхцаагүй, зорчих тээврийн стандартад нийцсэн 45 микро автобус нийтийн тээвэрт үйлчлэх юм байна. Эдгээр 45 микро автобус нь зайлшгүй нийтийн тээвэр хэрэгтэй, том оврын автобус явах боломжгүй Сонгинохайрхан дүүргийн 23 дугаар хороо, Баянгол дүүргийн 22 дугаар хороо, Баруун түрүүн, Партизан зэрэг чиглэлүүдэд үйлчлэх юм байна.

О.Сайхан