Дэлхийн аялал, жуулчлалын төв гэгддэг Франц улсын аялал, жуулчлалын салбар террорист халдлагуудын улмаас уналтад орж, жуулчдын тоо эрс буурч эхэлсэн талаар салбарын мэргэжилтнүүд мэдээлж байна.

Тухайлбал хамгийн өндөр зарцуулалттай жуулчдад тооцогддог АНУ, Ази болон Персийн булангийн орнуудын жуулчдын тоо эрс буурснаар долдугаар сарыг хүртэлх хугацаанд Франц улсад зочилсон жуулчдын тоо дунджаар 10 орчим хувиар буурсан гэж тус улсын аялал, жуулчлалын салбарын Төрийн нарийн бичгийн дарга Маттиас Фекл мэдэгдлээ.

"Исламын улс” бүлэглэл өнгөрсөн оны эхэн үеэс Европт удаа дараа террорист халдлага үйлдсэн бөгөөд долдугаар сард л гэхэд жуулчдын хамгийн их зочилдог Парис хотод олон хүний амийг авч одсон террорист халдлагыг зохион байгуулсан юм.

Хэдийгээр дээрх халдлагын дараа Францын Ерөнхийлөгч Франсуа Олланд нисэх онгоцны буудал болон жуулчдын хамгийн ихээр очдог газруудын аюулгүй байдлыг нэмэгдүүлэх арга хэмжээг эрчимтэй авах болсон ч эдийн засгийнх нь голлох хөдөлгөх хүч болдог аялал, жуулчлалын салбар үргэлжлэн уналтад орсоор байгаа ажээ.

Тухайлбал энэхүү халдлагын дараа Ницца руу нисэх олон улсын нислэгийн тоо өнгөрсөн жилээс 57 хувиар буурсан бол наймдугаар болон есдүгээр сард ч энэхүү тоо үргэлжлэн буурах хандлагатай байна. Түүнчлэн Парис хотын зочид буудлуудын орлого энэ оны эхний таван сард 14 хувиар буурсан үзүүлэлттэй гарчээ. Харин хотын хэмжээнд сэжигтэй зорчигчдын цүнхийг шалгах ажиллагааг эхлүүлснээр нийтийн тээврийн салбар ч уналтад орж эхлээд байгаа аж.

О.Намуун