Өмнөд Солонгост өнөөдрөөс эхлэн "хээл хахууль” гэдэг ойлголтыг илүү тодорхой болгосон хууль үйлчилж эхэллээ.

 

Хуулинд зааснаар, төрийн албан хаагчид, сэтгүүлчид болон дунд сургуулийн багш нар 50 мянган вон /45 доллар/-оос илүү үнэтэй бэлэг сэлт авах, зоогийн газарт 30 мянган вон /27 доллар/-оос дээш хэмжээний мөнгөөр дайлуулах, буяны цайллага болон баяр ёслолын үеэр 100 мянган вон /90 доллар/-оос давсан хэмжээний мөнгө авахыг хоригложээ. 

Түүнээс гадна, засгийн газрын албан тушаалтнууд их дээд сургуульд багшилсныхаа хөлсөнд авах мөнгөний дээд хэмжээг ч мөн тодорхой заасан байна. Тодруулбал, лекц уншсаны хөлсөнд 500 мянган вон /450 доллар/-оос их мөнгө авахыг хориглосон аж.

Өмнөд Солонгосын Ерөнхий сайд Хван Гё Ан хуулинд гарын үсэг зурах үеэрээ хэлэхдээ "энэ хуулийн ачаар манай улсад илүү шударга, илүү ил тод нийгмийг байгуулах боломжтой болно” гэжээ. Тэрбээр цааш нь дурдахдаа, хууль үйлчилж эхэлснээр хөдөө аж ахуйн компаниудад учрах хохирлыг багасгах талаар засгийн газар ажиллах болно гэлээ. Учир нь, өмнөд солонгосчууд аливаа баяр ёслолын үеэр бие биендээ дээд чанарын цагаан будаа, цай зэрэг үнэтэй хүнсний зүйлс бэлэглэдэг уламжлал дээр үеэс тогтсон гэнэ.

Шинээр баталсан хууль нь хүнсний бүтээгдэхүүн үйлдвэрлэгчдийн бизнест цохилт болно гэж хуулийг эсэргүүцэгчид үзэж байна.