Умард Солонгосын 140 мянган иргэнд хүнсний тусламж үзүүлжээ
Үерт нэрвэгдсэн Умард Солонгосын 140 мянга орчим иргэнд НҮБ-ын Дэлхийн хүнсний хөтөлбөр /ДХХ/ хүнсний яаралтай тусламж илгээжээ.
Өнгөрсөн наймдугаар сарын сүүлчээс эхлэн энэ сарын эхэн үе хүртэл тус улсын зүүн хойд нутагт ширүүн бороо орсны улмаас үер усны аюул нүүрлэсэн юм.
НҮБ-ын мэдэгдсэнээр, үерийн улмаас 133 хүн амиа алдаж, 395 хүн сураггүй болж, орон гэргүй болсон хэдэн арван мянган хүн хоргодох байранд амьдарч байна.
Үерээс эсэн мэнд үлдсэн 140 мянга орчим хүнд ДХХ-өөс жигнэмэг болон шар буурцагны шош хүргэж өгчээ. Үерийн улмаас үүссэн хохирлын хэмжээг бүрэн тогтоогоогүй байгаа учир тусламж авах шаардлагатай байгаа хүмүүсийн тоо нэмэгдэж магадгүй гэж ДХХ-ийн ажилтнууд хэллээ.
Мөн өвөл хаяанд ирээд байгаа энэ үед ургац алдаж, мал амьтан үхсэний улмаас умард солонгосчууд хүнсний ноцтой хомсдолд орж болзошгүй гэж албаны хүмүүс анхааруулж байна.
ДХХ олон улсын хамтын нийгэмлэгт хандан хандив өргөхийг уриалжээ. Ирэх оны наймдугаар сар хүртэл тусламжийн хөтөлбөрүүдийг хэрэгжүүлэхэд тус байгууллагад 21 сая доллар шаардлагатай байгаа аж.