Өнгөрсөн Ням гаригт Хар тэнгист осолдсон Оросын Ту-154 онгоцны хэсгүүдийг уснаас гаргаж дууслаа хэмээн эх сурвалж мэдээллээ.

Ослын эрэн хайх ажлын шуурхай хэсгийн мэдээгээр 19 зорчигийн цогцсыг гаргаж авсан бөгөөд үүнээс 17-г нь Москва таниулахаар илгээжээ.

Тэнгисийн уснаас гаргаж ирсэн онгоцны хэсгүүдийг Сочи хотод авчирч тусгайлан зассан талбайд нийлүүлэх ажил хийж байгааг шуурхай хэсгээс РИА Новости агентлагт мэдээлжээ.

Эрэн хайх ажиллагаа үргэлжилсээр байна. Аврах ангийн 3500 ажилтан, тэнгисийн 45 хөлгийг дайчлаад байна. Өчигдөр гэхэд шумбагчид 30 гаруй удаа тэнгисийн гүн рүү шумбаж, эрэн самнасан байна.

Шумбагчид онгоцны хэсгүүдээс гадна зорчигчдын эд зүйлс, баримт бичгийг олсоор байна.

Арванхоёрдугаар сарын 25-нд осолдсон Ту-154 онгоцонд 84 зорчиг, багийн найман гишүүн явсан нь бүгд осолдсон юм. Онгоц Москвагийн Чкаловский онгоцны буудлаас Сири рүү ничэх маршруттай байсан бөгөөд зам зууртаа Хар тэнгисийн эрэг дэх Адлер хотод бууж шатахуунаа цэнэглээд эргэн хөөрсөний дараа радараас алга болсон юм. Төдөлгүй онгоц тэнгисийн усанд унаж осолдсоныг олсон билээ.

А.ШАРАВ