Их хурлын даргын сануулга ба МАН-ын дэд сайдуудыг чөлөөлсөн долоо хоног
Цэцэрлэгийн бүртгэл явагдлаа
Нийслэлийн хэмжээнд цэцэрлэгийн бүртгэл өнгөрсөн долоо хоногт болж өнгөрлөө. Улсын хэмжээнд 2-5 насны 240 гаруй цэцэрлэгийн насны хүүхэд байгаа бөгөөд энэ жилийн хувьд 60-70 хувь нь цэцэрлэгт хамрагдах боломжтой тухай албаныхан мэдээлж байна. Учир нь цэцэрлэгийн барилгын хүчин чадал хангалтгүй байгаагаас нэг ангид заасан тооноос хэтэрсэн хүүхдүүд хүмүүжих болж байна.
Энэ жилийн цэцэрлэгийн бүртгэлийг зарим дүүргүүдэд сугалаагаар явуулсан юм. Үүнийг эцэг эхчүүд эсэргүүцэж байсан ч яамнаас шийдсэн учир эцэг эхчүүд сугалаа татсан юм.
МАН-ын дэд сайдуудыг чөлөөллөө
Даваа гарагт болсон газрын хуралдаанаар МАН-аас томилогдсон дэд сайдуудыг чөлөөлсөн. Тодруулбал Засгийн газрын тухай хуулийн 18 дугаар зүйлийн 5 дахь хэсэг, 181 дүгээр зүйлийн 5 дахь хэсэг болон асуудал хариуцсан сайд нарын саналыг тус тус үндэслэн:
- Н.Оюундарийг Гадаад хэргийн дэд сайдын
- Х.Баделханыг Аж үйлдвэрийн дэд сайдын
- Я.Төмөрбаатарыг Боловсрол, соёл, шинжлэх ухааны дэд сайдын
- Б.Мөнхбаатарыг Хүн амын хөгжил, нийгмийн хамгааллын дэд сайдын
- Г.Тэмүүлэнг Уул уурхайн дэд сайдын
- Б.Батзоригийг Хүнс, хөдөө аж ахуйн дэд сайдын
- Д.Атармааг Эрүүл мэнд, спортын дэд сайдын үүрэгт ажлаас чөлөөлсөн юм.
Тэгвэл тэдний оронд дэд сайдад томилогдох квотыг эрх баригчид 3+3+1 гэсэн зарчмаар хуваарилсан байна.
ОХУ-аас 100 тонн улаанбуудай импортлоно
Онцгой комиссын хуралдаанаар энэ жил улсын хэрэгцээний улаанбуудай 100 гаруй мянган тонноор дутахаар байгаа аж. Өөрөөр хэлбэл, Монгол Улсын жилийн хэрэгцээнд 320 мянган тонн буудай шаардлагатай. Харин өнөө жил 100 мянга гаруй тонноор дутах тооцоо гарч байгаа учраас ургацаа хурааж авсны дараа импортын асуудлыг ярьж эхэлнэ.
Өнгөрсөн жилүүдэд гурилын үйлдвэрүүд буудай импортоор авч гурил үйлдвэрлэдэг байсан нь үнийн бодлого алдагдахад нөлөөлж байна гэж үзсэн учраас Хүнс, хөдөө аж ахуйн яам гадаад орнуудтай улаанбуудайн импортын гэрээ байгуулж, орж ирснийх нь дараа гурилын үйлдвэрүүдэд худалдах бодлого барьж байгаа аж.
Тиймээс улаанбуудай импортоор авахад зориулж 80 тэрбум төгрөг шаардлагатай болж байгаа бөгөөд уг хөрөнгийг Хөгжлийн банкнаас гаргах шийдвэрийг Засгийн газрын хуралдаанаас гаргаад байсан. Гэвч өнөөг хүртэл хөрөнгө мөнгөний асуудлыг шийдвэрлээгүй байгааг албаны эх сурвалж хэлэв. Тиймээс энэ асуудалд салбарын яам анхаарч, Хөгжлийн банктай ярилцаж байгаа аж. Харин улсын хэмжээнд дутагдах буудайг ОХУ-аас импортлоно гэдгийг албаныхан танилцуулав.
"KFC” ресторанд дээрэм хийсэн хүүхдүүдийг саатууллаа
Сүхбаатар дүүргийн "Выставка” худалдааны төвийн урьд байрлах "KFC" түргэн хоолны ресторанаар үйлчлүүлж байсан хүүхэдтэй эмэгтэйг дээрэмдсэн бичлэг олон нийтийн сүлжээгээр цацагдсан. Тодруулбал, эмэгтэйг хүүхдээ хооллоод сууж байхад IPHONE GOLD гар утсыг нь аван зугтсан юм. Утсан дээр нь ажлын чухал материалууд, контактууд байсанд үнэхээр харамсаж байгаагаа эмэгтэй мэдэгдэж цагдаад хандсан. Улмаар цагдаагийн алба хаагчид шуурхай ажиллан дээрэм хийсэн хүүхдүүдийг саатуулжээ. Тодруулбал, А гэх уг хүүхэд нь бусадтай бүлэглэн уг хэргийг үйлдсэн байна. А нь цагдаагийн байгууллагад бүртгэлтэй байдаг, удаа дараа хулгайн хэрэгт холбогдож шалгагдаж байсан боловч насанд хүрээгүй шалтгаанаар суллагддаг байсан хүүхдүүдийн нэг юм байна. Түүнийг саатуулан, Сүхбаатар дүүргийн цагдаагийн хэлтэст мөрдөн байцаалтын ажиллагаа явуулжээ.
Их хурлын дарга Ерөнхий сайдад хууль биелүүлэхийг сануулав
УИХ-ын дарга З.Энхболд өнөөдөр Ерөнхий сайд Ч.Сайханбилэгт "Хууль хэрэгжүүлэн ажиллах тухай" албан тоот хүргүүлсэн.
Уг албан тоотод "Монгол Улсын Ерөнхий сайдын өргөн мэдүүлсний дагуу 2015 оны 08 дугаар сарын 06-ны өдөр Улсын Их Хурлын ээлжит бус чуулганы хуралдаанаар Засгийн газрын зургаан сайдыг албан тушаалаас нь чөлөөлсөн. Засгийн газрын тухай хуулийн 21 дүгээр зүйлийн 2-т, "Ерөнхий сайд, Засгийн газрын гишүүн хуульд заасан үндэслэлээр албан тушаалаас огцорсон, чөлөөлөгдсөн, түүнчлэн нас нөгчсөн тохиолдолд түүний бүрэн эрх хугацаанаас өмнө дуусгавар болно. Ийнхүү Ерөнхий сайд, Засгийн газрын гишүүн орон гарсан тохиолдолд Улсын Их Хурал 30 хоногийн дотор түүнийг нөхөн томилно. Нөхөн томилогдсон гишүүний бүрэн эрхийн хугацаа нь тухайн Засгийн газрын бүрэн эрхийн үлдсэн хугацаатай адил байна” гэж заасан байна. Хуулийн энэхүү заалтын дагуу 2015 оны 08 дугаар сарын 06-ны өдөр албан тушаалаас чөлөөлөгдсөн Засгийн газрын зургаан гишүүний оронд томилох сайд нарыг 2015 оны 09 дүгээр сарын 06-ны дотор Улсын Их Хурал нөхөн томилох ёстой. Иймд Монгол Улсын Ерөнхий сайд Та Засгийн газрын тухай хуулийн энэхүү заалтыг хэрэгжүүлж, шинээр томилогдох Засгийн газрын гишүүдийг Улсын Их Хуралд өргөн барихыг хүсье” гэжээ.
Өчигдөр Ерөнхий сайдын хэвлэлийн төлөөлөгч Ц.Мөнхтөр мэдээлэл хийхдээ ирэх намрын чуулган болтол шинэ сайдуудын нэрсийг Их хуралд өргөн барих боломжгүй. Нэрс нь тодорсон ч шинэ сайдуудын нэрсийг Ерөнхий сайд өргөн барихгүй гэж мэдэгдсэн. Мөн тэр болтол эзэнгүй сайдуудын үүрэгт ажлыг үүрэг гүйцэтгэгчид хийнэ гэж мэдээлсэн.
Г.Ган