Дундговь аймгийн нутагт ураны хайгуул эрхэлж байсан Канадын "Denison Mines” компани өөрт байсан лицензүүдээ зарж Монголоос гарч байгаагаа өчигдөр мэдэгдлээ. Тус компани Дундговийн Гурвансайхан суманд 1994 оноос хойш хайгуулын үйл ажиллагаа эрхэлсэн бөгөөд 85 хувийг нь эзэмшдэг хамтарсан үйлдвэр, мөн тус аймгийн нутагт эзэмшиж байсан хоёр лиценз, Сүхбаатар аймгийн Түвшинширээ суманд эзэмшиж байсан нэг лицензээ бүгдийг нь нийлүүлж 13 сая 250 мянган доллароор зарахаар болжээ. Харин тэдгээр лицензийг нь ураны салбарт ажилласан 75 жилийн туршлагатай Чехийн "Uranium Industry” компани авахаар болж урьдчилгаа төлбөр болох нэг сая 200 мянган доллароо шилжүүлснээ мөн өчигдөр мэдэгдсэн байна. "Uranium Industry” нь өнгөрсөн долдугаар сард манай төрийн өмчийн "Мон-Атом” компанитай хамтран "Mon Czech Uranium” хэмээх компани байгуулсан юм. Чех улс анх 1840 онд уран олборлож эхэлсэн түүхтэй бөгөөд дэлхийн хамгийн том 10 олборлогчийн нэг билээ.