АНУ-ын Үндэсний аюулгүй байдлын агентлаг Францын улс төр, бизнес эрхлэгчдийн томоохон төлөөллүүдийг тагнадаг байсан тухай шинэ мэдээллийг Францын Liberation сонин болонMediapart сайт Викиликстэй хамтран өчигдөр /06.29/ нийтэлсэн байна.

"Эдийн засгийн тагнуул: АНУ-ын бохир тоглоом” гэж нэрлэгдсэн нийтлэлд АНУ-ын тагнуулын байгууллага Францын Эдийн засгийн яамны удирдлага дор байдаг томоохон компаниуд, тэдгээрийн гадаадын компаниудтай хийсэн томоохон гэрээ хэлэлцээр, Парис "Их найм”, "Их 20” зэрэг олон улсын байгууллагуудтай тогтоосон харилцаа зэрэг өөрийн ашиг сонирхолд нийцсэн эдийн засгийн мэдээллийг тагнадаг байсан талаар бичжээ.

АНУ-ын Үндэсний аюулгүй байдлын зорилго нь мэдээллийн технологи, цахилгаан эрчим хүч, байгалийн хий, газрын тос, цөмийн эрчим хүч, тээвэр, биотехнологи зэрэг стратегийн салбарыг тагнах байжээ.

Тагнуулын аргаар олж авсан эдгээр мэдээлэл нь АНУ-ын талд өрсөлдөөний асар их давуу талыг олгодог байсан. Түүнчлэн Их Британи, Канад, Шинэ Зеланд, Австрали гэсэн холбоотнууд олж авсан мэдээллээ хуваалцдаг байсан гэж эх сурвалж мэдээллээ.

Сануулахад АНУ-ын Үндэсний аюулгүй байдлын агентлаг 2006-2012 оны хооронд Францын одоогийн Ерөнхийлөгч Франсуа Олланд болон түүний өмнөх төрийн тэргүүн Жак Ширак, Николя Саркози нарыг тагнаж байсан хэмээн Викиликс сайт өнгөрсөн долоо хоногт мэдэгдсэн билээ.