Голландын хөлбөмбөгчид үеийн үед дэлхийд алдраа дуурсгасаар ирсэн. Й.Круффи, Р.Макаай, Э.Давидс, Э.Ван Дер Сар, Р.Ван Нистелроой, А.Роббен, Р.Ван Перси, У.Шнайдер, Б.Ван Марвик нар "Улбар шарууд”-ын шигшээ багт тоглож байлаа. Тэдгээрээс 2014 оны дэлхийн аваргын үеэр нэгэн гайхалтай гоол оруулсан довтлогч бол Робин Ван Перси юм.

Дэлхийд "Нисдэг Голланд” хэмээх нэрийг дахин дуурсгасан Р.Ван Перси 1983 оны наймдугаар сарын 6-нд Роттердам хотод төрсөн. "Фейноорд” клубт анхны мэргэжлийн тамирчны тоглолтоо хийсэн бөгөөд 2004 онд Английн алдарт "Арсенал” клубт иржээ. "Их буучид”-тай найман улирлыг өнгөрүүлэхдээ 194 тоглолтод, 96 гоолыг оруулж, мэргэн буучын "Алтан шаахай” шагналыг авч байв.

Мөн "Арсенал”-ын хамтаар 2005 онд Холбооны цомын аварга болжээ. Гэхдээ Премьер лигт түрүүлж чадаагүй учир багаа орхих шийдвэр гаргаж, 2012 оны зун "Манчестер Юнайтед” клубт ирсэн байна. "Улаан чөтгөрүүд”-ийн бүрэлдэхүүнд ирсэн улиралдаа буюу 2012-2013 онд Премьер лигийн аварга цолыг хүртжээ. Харин үүний дараах улиралд "МЮ” уналтанд орж, "Аваргуудын лиг”-ийг өнжсөн бөгөөд өнгөрсөн улиралд лигтээ дөрөвдүгээр байр эзлэхэд Р.Ван Перси өөр багт шилжихээр болсон. Тэрээр ирэх намраас Туркийн "Фенербахче” клубт тоглоно.

Харин шигшээ багтаа 2000 оноос хойш нас насны ангилалд нь тоглож байгаад 2005 онд үндсэн бүрэлдэхүүнд багтсан юм. "Нисдэг Голланд”-ын төлөө Европын аваргад төдийлөн амжилт гаргаагүй ч сүүлийн хоёр дэлхийн аваргаас медаль хүртсэн юм. 2010 онд ӨАБНУ-д болсон дэлхийн аваргад алтан медалийн төлөө Испанитай тоглож, 1:0-ээр ялагдсан. Харин 2014 онд Бразил улсад болсон дэлхийн аваргад хүрэл медаль энгэртээ зүүсэн.

Тэр тэмцээний хэсгийн тоглолтод өмнөх дэлхийн аваргын шигшээд хожигдсон Испанитай оноолт таарсан бөгөөд Голланд 5:1-ээр өрсөлдөгчөө бут ниргэсэн. Мөн Робин Ван Перси маш чадварлаг гоолыг мөргөн оруулж, нисдэг Голландын нэрийг дэлхийд дахин дархалсан юм.

Э.Гүнтөмө