Хөгжмийн зохиолчдоос хамгийн ариун цагаан хүн тэнгэрээс аваад ир гэвэл, Э.Чойдог, Г.Дарамзагд хоёр /бичлэг/
"Дэндэвийн Пүрэвдорж гуай нийгмээ сөрж туурвисан хүн” гэж яруу найрагч Ц.Хуланг хэлэхэд хөгжмийн зохиолч Н.Жанцанноров "Сөрсөн гэхээсээ илүүтэй, тухайн цаг үедээ багтахгүй хальж явсан хүн юм” гэж "дийлэв”. Д.Пүрэвдорж гуай ойгүй олон дуутайнхаа нэлээдийг Гончигдамбын Дарамзагд гэж гениальный (Жа абугайн хэлснээр) хөгжмийн зохиолчтой нийлж хийжээ. "Орчлонд би азтай төржээ” гэдгээс авахуулаад. "Аваргууд бол жин жингээрээ явдаг юм байна лээ. Би бол Д.Пүрэвдорж гуайд жижигдээд жин таараагүй. Бүр сүүлд "Арвайн тал” гэдэг шүлгэнд нь ая хийгээд сонсгох гэхнээ айсаар яваад амьд сэрүүнд нь чадаагүй” гэнэ ээ, Жа аварга. Аа Г.Дарамзагд гуайн бүтээсэн дуу бол бүр ойгүй ажээ. "Өргөн Сэлэнгэ” гэж агуу дуунаас авахуулаад. Адгийн наад зах нь л, миний муу аавын ганц мэддэг "Болзоо” (Сарьдаг өндрийн оройгоор сайхан яргуй цэнхэртээд...) гэж дуу ардынх шиг санагддаг байсан чинь Г.Дарамзагд гуайн нэг шедевр юм байна. Ер нь бол 400 гаруй дуу зохиосон хүн гэдэг. Москвагийн консерваторийн найрал дууны удирдаачийн ангийг Монголоос Д.Лувсаншарав, Г.Дарамзагд гэж хоёр хүн л дүүргэжээ. "Г.Дарамзагдын өөр өөр дуу нь өөрийнх нь биш мэт, хоорондоо давтагддаггүй, шал ондоо хүн зохиосон юм шиг байдаг. Дуун дээр хаашаа ч хөлбөрч, юу ч бүтээж болно гэдгийг харуулсан” гэж Жа маэстро бахтай ярив. Түүний үзсэнээр энэ их зохиолч нэгэнтээ Дуурийн театрт үүдний жижүүр хийгээд сууж байсан гэнэ. Сэлэнгэ их мөрний тухай аварга дуу зохиосон энэ хүн 49 насныхаа жил дээр Сэлэнгэ мөрөнд хальжээ. "Монголын хөгжмийн зохиолчдоос хүнийхээ хувьд хамгийн ариун цагаан хүн тэнгэрээс аваад ир гэвэл Э.Чойдог, Г.Дарамзагд хоёрыг хөтлөөд туулаа!” гэж дуу алдвай, Жанцанноровтон.
"Зүрхэнд мөнхөрсөн аялгуу” гэж, нэг ийм хоёр хүн суугаад, ийм хүмүүсийн тухай, ийм ийм юм ярьдаг, ийм дуу сонсгож, ийм үүх түүх хүүрнэдэг нэвтрүүлэг бий. Миний л хувьд, Үндэсний телевизийн элдэв шалдав юмнуудаас илүүтэй, бүтнээр нь үздэг ганцхан нэвтрүүлэг маань. Сэдэв нь сонирхолтой, тов тодорхой, баялаг; ярих хүмүүс нь юмаа мэддэг, уянгалаад хадуураад байхгүй, хэмжээтэй; хийц нь жигдхэн, цэвэрхэн, хөнгөхөн. Би л лав эхнээс нь дуустал үздэг. Үнэн ганган контент доо. Энийг нэгтгээд CD энэ тэр гаргадаг болоосой, хэзээ хойно үзсэн ч уйдахгүй ажгуу. Үзээгүй хүн байвал нэг сонирхоотхоорой, лав миний хойноос орох вий.
Эх сурвалж:tonshuul.mn