Өдөрт хоёроос илүү цагаар компьютер дээр ажилладаг хүмүүсийн 70 хувийнх нь нүдний хараанд өөрчлөлт ордгийг Америкийн нүдний өвчин судлалын холбоо судалгаагаар нотолжээ. Мөн нүд хорсох, халуу оргих, улайх, хуурайших, нүдний фокус алдагдаж, дүрс бүдгэрч, эсвэл давхардаж харагдах зэрэг өвчний хам шинж илэрдэг.

Түүнчлэн компьютерын дэргэд удаан сууснаар толгой өвдөж, хүзүүгээр хөшиж ядардаг. Учир нь компьютер дээр ажиллах явцад дэлгэцэн дээрх аливаа дүрсийг байнга харснаар нүдний ачаалал эрс нэмэгддэг төдийгүй дэлгэцний туяа нүдний торлог бүрхэвчинд сөргөөр нөлөөлдөг байна. Ингэснээр нүдний торлог эвдэрч, болор булингартан, судаснууд гэмтдэг аж.
Тиймээс нүдээ эрүүл байлгахын тулд дараах энгийн таван дүрмийг мөрдөх хэрэгтэй:
1. Дэлгэцийн байрлал
Мэргэжилтнүүдийн үзэж буйгаар дэлгэц нүүрний эгц өөдөөс бус, нүднээс 15-20 градусын доор, 50-70 см-ийн зайд байх нь оновчтой юм байна. 
2. Гэрэлтүүлэг
Компьютерийн дэлгэцэн дээр цонхны болон чийдэнгийн гэрэл шууд тусахгүй байх хэрэгтэй. Дэлгэцд туссан эдгээр гэрэл нүдэнд нэмэлт ачаалал өгдөг. Өрөөний гэрэлтүүлэг жигд, тод байх нь чухал.
3. Ажлын байр 
Ширээний чийдэнг компьютерийнхээ зүүн гар талд байрлуулаарай. Ажиллах явцдаа ном, бусад материал ашигладаг бол толгойгоо нааш цааш нь эргүүлэхгүйгээр шууд харагдахаар өмнөө дэлгэх нь тохиромжтой байдаг.
4. Нүдний амралт
Компьютер дээр ажиллахдаа хоёр цаг тутамд нүдээ 15-20 минут амрааж байх хэрэгтэй. Түүнчлэн 20 минут тутамд 20 секундын завсарлага аваарай. Нүдээ хуурайшуулахгүйн тулд байн байн цавчилж бай. 
5. Каротиноид, витамин
Дэлгэцийн туяаны сөрөг нөлөөнөөс нүдний торлог бүрхэвчийн гол бодис - каротиноид лютеин хамгаалж чадна. Мөн нүдээ эрүүл байлгахын тулд А, Е болон С витаминуудыг хэрэглээрэй.