Абэ: Япон улс газар нутгийн маргаанаа шийдсэний үндсэн дээр ОХУ-тай найрамдлын гэрээ байгуулна
Японы Засгийн газар газар нутгийн маргаантай асуудлыг шийдсэний үндсэн дээр ОХУ-тай найрамдлын гэрээ байгуулахаар төлөвлөж байна. Энэ тухай Японы Ерөнхий сайд Шинзо Абэ улсынхаа парламентын чуулганы нээлтийн үеэр үг хэлэхдээ мэдэгджээ.
"Япон болон ОХУ хоорондын харилцаа хэвийн бус байдалд байгаа билээ. Хоёр орны хооронд найрамдлын гэрээ байгуулалгүй 70 гаруй жил өнгөрчээ” гэж тэрбээр хэлсэн байна. Үүний сацуу тэрбээр ОХУ-ын Ерөнхийлөгч Владимир Путины 2016 оны арванхоёрдугаар сард Японд хийсэн айлчлалын дүнд хүрсэн тохиролцоог тууштай биелүүлж байгаа болохыг онцлон тэмдэглэжээ.
Ерөнхийлөгч Владимир Путинтай бий болгосон итгэлцлийн харилцаанд үндэслэн бид газар нутгийн маргаантай асуудлыг шийдэж, ОХУ-тай найрамдлын гэрээ байгуулна. Бид хоёр улсын харилцаанд шинэ эринийг нээнэ гэж Японы Ерөнхий сайд Шинзо Абэ мэдэгдсэн байна.
Урьдчилсан болзолгүйгээр найрамдлын гэрээг энэ онд багтаан байгуулах саналыг ОХУ-ын Ерөнхийлөгч Владимир Путин есдүгээр сард болсон Зүүн Азийн эдийн засгийн форумын хэлэлцүүлгийн үеэр Японы талд тавьсан билээ.
Сэтгэгдэл байхгүй байна.