Намар болж ажил эхэллээ. Өнөөдөр есдүгээр сарын нэгэн хүүхэд багачууд хичээлийн шинэ жилийн нээлтээ хийж энэ жилийн тэдний ажил ийн эхэлж байна. Харин томчуудын хувьд амралт дуусаж их ажил ундарч байна. Хөдөө орон нутгийн иргэд, тариаланчид ч ургацаа хураах, өвлийн бэлтгэлээ базаах гээд ажлууд ар араасаа ундарч байна. Тэгвэл энэ онд улсын хэмжээнд 434.5 мянган га-д тариалалт хийсэн байна.

    Урьдчилсан балансаар 466.6 мянган тонн үр тариа хураан авахаар байгаа нь нэг га-гаас дунджаар 15.2 цн буудай, 116.3 цн төмс, 121.4 цн хүнсний ногоо, 5.8 цн тосны ургамал, 26.7 цн малын тэжээлийн ургамал тус тус хураан авах боломж бүрдүүлсэн. долоодугаар сарын сүүлч, наймдугаар сарын эхний 15 хоногт нийт нутгаар хур тунадас багасч, халснаас үүдэн хураалтын ажил урьд жилүүдээс 7-10 орчим хоногоор эрт эхэлж буй аж.