Халим агнуурын олон улсын комиссоос /IWC/ гарч, халим агнах ажлыг дахин эхлүүлэх тухай Японы Засгийн газрын шийдвэрийг байгаль орчин хамгааллын "Greenpeace” байгууллага шүүмжилсэн байна.

 

"Greenpeace” байгууллагын Япон дахь салбарын гүйцэтгэх захирал Сэм Аннеслигийн хэлснээр, Засгийн газар дээрх мэдэгдлийг оны эцсээр хийсэн нь олон улсын хэвлэл мэдээллийн хэрэгслүүдийн бай болохоос зайлсхийхийг оролдож буй явдал аж. Тэрбээр цааш үргэжлүүлэн хэлэхдээ, Япон улс халим агнуурын ажлыг дахин эхлүүлэхээс илүүтэйгээр далайн экосистемийг хадгалахад хүчин чармайлт оруулах хэрэгтэй гэжээ.

Далайн ус нь хүчиллэгжих, хуванцар хаягдалд бохирдох хийгээд загасны нөөц дуусах зэрэг олон аюул заналтай тулгарах болсныг С.Аннесли онцлон тэмдэглэжээ. Япон нь арлын орны хувьд далайн нөөцөөс ихээхэн хамааралтай байдаг хэмээгээд, цаашид тэдгээр асуудлыг шийдвэрлэх чиглэлд ажиллахыг тус улсын Засгийн газарт уриалсан байна.