Пүрэв гарагт Бангладешийн нийслэл Дака хотод 22 давхар арилжааны барилгад гал түймэр гарсны улмаас 19 хүн амиа алдаж, 70 гаруй хүнийг эмнэлэгт хүргэжээ. Үүний зэрэгцээ наад зах нь 12 хүн барилгад гацсан байж болзошгүй байна.

 

Гал түймэр барилгын зургадугаар давхарт дэгдэж эхэлсэн ба дээд давхарууд руу тархжээ. Галыг унтраахад нисдэг тэргүүдээр туслалцаа үзүүлж, 7 орчим цагийн дараа бүрэн унтраажээ.

Зарим давхрууд руу ороход хэтэрхий халуун хэвээр байгаа тул ослын газарт эрэн хайх, аврах ажиллагаа явуулахад хүндрэлтэй байна гэж гал сөнөөгчид хэлжээ. Цагдаагийн газрын ажилтнуудын мэдээлснээр, зарим хүн түймрээс зугтахын тулд барилгаас үсэрсэн аж. 

"Гал түймэр гарсан барилгын ойр орчимд гадаадын олон компанийн оффис байрладаг” гэж Дака хот дахь Японы Элчин сайдын яамнаас "NHK" сувагт мэдээлжээ.