Их Британийн хатан хаан II Елизавета АНУ-ын Ерөнхийлөгч Дональд Трампыг зургадугаар сард эх орондоо айлчлахыг албан ёсоор урихаар төлөвлөж байна. Энэ тухай "The Sunday Times” сонин ням гарагт мэдээлжээ.

 

Тус сонинд мэдээлснээр, Их Британийн Засгийн газрын төлөөлөгчид Цагаан ордны төлөөлөгчидтэй өнгөрсөн оны сүүлчээс хойш нууц хэлэлцээ хийж байгаа аж. Айлчлалыг Нормандад холбоотны цэрэг буусны 75 жилийн ойг тэмдэглэх үеэр зохион байгуулж магадгүй байна. Харин Трамп Франц улсад болох дурсгалын арга хэмжээнд оролцохоор төлөвлөж байгаа юм.

Их Британийн хатан хаан II Елизавета тус улсад суугаа АНУ-ын Элчин сайд Вуди Жонсонтой гуравдугаар сард уулзсан бөгөөд талууд Америкийн Ерөнхийлөгчийн айлчлалыг удахгүй зарлана гэж "The Sunday Times” сонинд онцлон тэмдэглэжээ.

Дональд Трамп 2018 оны долдугаар сард Их Британид гурван өдрийн ажлын айлчлал хийсэн билээ. Айлчлалынхаа үеэр тэрбээр Их Британийн Ерөнхий сайд Тереза Мэйтэй хэлэлцээ хийж, хатан хаан II Елизаветад бараалхсан. Трампыг айлчлах үеэр АНУ-ын явуулж буй бодлогыг эсэргүүцсэн жагсаал болж байв.