Сүүлийн үед Дүнбэгмайл ХХК-ийн "Ким баб Чон Гүг” гэх Солонгос хоолны газрын талаарх иргэдийн гомдол тасрахаа больжээ.

Тухайлбал, өнгөрсөн хугацаанд тус хоолны газрын "Хороолол” дахь салбараар үйлчлүүлсэн иргэдийн зүгээс "хоолноос нь жоом гарсан, үйлчлүүлж буй орчинд нь жоом гүйж явсан, хоолны газрын хана, шалаар нь жоом явж байдаг. Тэр ч бүү хэл хулгана хүртэл хоолны зааланд нь гүйж явсныг зураг, бичлэгээр баримтжуулж олон нийтэд  анхааруулж байсан.

Тэрчлэн саяхны нэг өдөр Баянзүрх дүүрэгт байрлах салбараар үйлчлүүлсэн иргэний гомдлын дагуу БЗД-ийн Мэргэжлийн Хяналтын хэлтсээс шалгалт хийж үйл ажиллагааг нь түр зогсоосон.

Тодруулбал, Мэргэжлийн хяналтын шалгалтаар тус хоолны газар хоолны дээж аваагүй ба хүнсний түүхий эд бүтээгдэхүүний хадгалалтын горим зөрчсөн, хоол үйлдвэрлэлийн байрны ариутгал цэвэрлэгээ хангалтгүй, түүхий эд хүнсний бүтээгдэхүүнийг хүлээж авах, шалгах, ангилан ялгалт хийх эрүүл ахуйн шаардлага хангасан зориулалтын цэггүй зэрэг зөрчил илэрсэн байна. Мөн хөргөх, хөлдөөх тоног төхөөрөмжийн температурын хэвийн ажиллагаа алдагдсан, хуурай хүнсний бүтээгдэхүүнийг хадгалах зориулалтын агуулахгүй, хоол, түүхий эд шарах тосны чанарыг шалгадаггүй, 3-4 хонуулсан чанар нь муудсан тос ашиглаж байжээ. Үүнээс гадна нэг том ноцтой зөрчил бол нэг хоолыг олон дахин халааж үйлчлүүлэгчид олгодог, үйл ажиллагаандаа хуульд заасан зохистой дадал нэвтрүүлээгүй байсан нь хоол хүнсээр дамжих эрсдэлт хүчин зүйл үүсгэсэн байна.

Гэвч тус хоолны газар хэдхэн хоноод алдаа дутагдлаа арилгасан нэрийн дор дахин үйл ажиллагаагаа явуулж эхэлжээ.

Тэгвэл үйлчлүүлэгч нар нь байнга гомдоллож байдаг "Ким Баб Чонгүг” сүлжээ хоолны газрын "3-4 хороололд байрлах, /Москва их дэлгүүрийн баруун талын/ "Ким Баб Чон Гүг коrean food” салбараар саяхны нэг өдөр үйлчлүүлсэн иргэн дахин гомдол гаргаж, тухайн хоолны газарт "жоом” гүйж явахыг зураг, бичлэгээр дүрсжүүлж авчээ.

Тэрчлэн тухайн иргэн өөрийн цахим хуудаснаа "хоол идэж байхад жоом гүйхээр нь хэлсэн чинь шал тоохгүй "манай материалаа хураадаг складанд байхгүй ороод үз. Тэгээд яв” гэнэ. Орьё гээд орсон чинь нүдэн дахиад материал дээр нь жоом гүйж явах юмаа. Энэ бохир газар яаж хоол идэж байна. Шэйр хийж бусдадаа түгээхгүй бол өвчин тусах нь байна шүү. Мэргэжлийн хяналт юу хийж байна” хэмээн анхааруулж бичжээ. Гэтэл тус газар одоог хүртэл иргэдэд үйлчилсээр байна.

Тус иргэний гомдол гаргасан "Ким Баб Чон Гүг” сүлжээ ресторан нь Улаанбаатар хотод олон газар салбартай аж. Тодруулбал, Төмөр зам, 13-р хороолол, 3,4-р хороолол, Саппоро зэрэг газруудад салбараа байгуулжээ. Тэдгээрээс өмнө нь 3,4-р хороолол, 13-р хороололд байрлах хоолны газруудаас нь жоом, шавьж гарч, мөн л үйлчлүүлэгч гомдол гаргаж байжээ. 

Гэвч тухай бүрд нь Мэргэжлийн хяналт ажилладаг ч өнөөг хүртэл "Ким Баб Чон Гүг” хоолны газрынхан "жоом”-той хоолоор үйлчилдэг дутагдлаа арилгаагүй байна. Тэр бүү хэл энэхүү эрүүл ахуйн шаардлага хангаагүй дутагдлаа үйлчлүүлж буй жирийн иргэд рүү чихэх гэж оролддог болсон байна.

Ийм л бохир заваан орчинтой, иргэдийн эрүүл ахуйд заналхийлсэн "жоом”-той хоолоор үйлчилдэг, хана, шалаар нь "жоом” гүйдэг "Солонгос” эзэдтэй хоолны газар нийслэл хотод өдөр, шөнөгүй үйл ажиллагаа явуулсаар байна.

Мэргэжлийн хяналт, холбогдох байгууллага дорвитой арга хэмжээ авч "Жоом”-той хоолоор үйлчилдэг, "жоом”-ны үүр болсон "Ким Баб Чон Гүг” хоолны газрын үйл ажиллагааг бүр мөсөн зогсоохгүй бол энэ байдал давтагдсаар, иргэд өдөр бүр "жоом”-той хоолоор хооллосоор байх нь ээ...

Бичлэгийг эндээс

А.ТАМИР

АРДЧИЛАЛ.МН