Дайн дажингүй энхийн цагт эр цэргийн албанд мордсон цэргүүд амиа алдаж, эрэмдэг зэрэмдэг болно гэдэг нь их харамсалтай.

Энэ он гарсаар дөрвөн цэрэг амиа алдаж, нэг цэрэг хүнд бэртэл авчээ. Тодруулбал, өнгөрсөн нэгдүгээр сард Дорноговь аймгийн Зүүнбаянд цэргийн алба хааж байсан А нь учир битүүлгээр амиа алдав.

Мөн хоёрдугаар сард Увс аймгийн Баруунтуруун суманд цэргийн алба хааж байсан В нь Тува улсын нутаг дэвсгэрт амиа алдсан байсан. Түүнчлэн гуравдугаар сард Налайх дүүрэгт Зэвсэгт хүчний 310 дугаар ангийн алба хаагч, ахлах ахлагч Г ангийнхаа элс ачсан "Зил-130” машинд дайруулж, харамсалтайгаар амиа алдсан бол энэ долоо хоног дахиад нэг цэрэг амиа алдсан харамсалтай хэрэг гарсан.

Тодруулбал, Дорноговь аймгийн Хатанбулаг сум, Хилийн цэргийн 0168 дугаар ангийн байлдагч А нь тавдугаар сарын 26-ны өдөр адуунд чирэгдэж амиа алдав.

Харин Ховд аймгийн Зэвсэгт хүчний 123 дугаар ангийн цэрэг 18 настай залуу дунд чөмөг хугарсан гэсэн оноштойгоор хагалгаанд орж, эмчилгээ хийлгүүлж байна.

Энх цагт цэргүүд амиа алдаж байгаад хэн хариуцлага хүлээх, хэн анхаарах ёстой вэ.

О.Гэрэл
Оллоо.mn