Авлигын мөнгөө “0111-УБЭ” улсын дугаартай Бенз машиныхаа тээшнээсээ гаргаж ажилчиддаа тараажээ
Мэргэжлийн хяналтын ерөнхий газрын Хилийн хорио цээрийн хэлтсийн дарга Э.Аззаяа газрын дарга Н.Баярсайхантайгаа үгсэн хуйвалдаж албан тушаалын давуу байдлаа урвуулан ашиглах замаар бусдаас их хэмжээний авилга, хээль хахууль авсан гэх хэргийн баримтуудыг манай сайт цувралаар олон нийтэд мэдээлж байгаа билээ.
Энэ хүрээнд яллагдагч С.Бүрэнтөгсийн мэдүүлэгт тулгуурлан Э.Аззаяа шүүхэд хэрхэн худал мэдүүлэг өгсөн болохыг дэлгэж байна.
Яллагдагч Э.Аззаяагийн тухайд шүүхэд мэдүүлэхдээ, "2014 оноос Мэргэжлийн хяналтын газарт хэлтсийн даргаас газрын дарга хүртэл дэвшин ажилласан. Яллах дүгнэлтээр намайг Баярсайханы бусдаас авлига авсан гэх үйлдэлд намайг бүлэглэсэн, хясан боогдуулсан гэж байгааг хүлээн зөвшөөрөхгүй. Миний хувьд иргэд, аж ахуйн нэгжээс ирсэн хүсэлтүүдийг зохих албан тушаалтнуудад цохож, хуваарилдаг. Тухайн хүсэлтийн дагуу өгч байгаа бичгүүдэд би гарын үсэг зурдаггүй, ямар нэг гэрээ байгуулдаггүй. Мөн аж ахуйн нэгж болон иргэдээс нэг ч удаа мөнгө авч байгаагүй” хэмээн ярьсан байдаг.
Тэгвэл Э.Аззаяагийн бусдаас нэг ч удаа авилга авч байгаагүй гэдэг нь оргүй худлаа үг бололтой. Үүнийг Мэргэжлийн хяналтын ерөнхий газрын экспорт, импорт, хилийн хорио цээрийн хяналтын хэлтсийн улсын ахлах байцаагч С.Бүрэнтөгсийн яриа нотолж байна.
С.Бүрэнтөгсийн тухайд Н.Баярсайхан, Э.Аззаяа нартай бүлэглэн бусдыг хяхан боогдуулах замаар авлига авсан гэх хэрэгт сэжигтнээр татагдаж ял сонссон ч Э.Аззаяа, Т.Элдэв-Очир, С.Бүрэнтөгс нарт холбогдох хэргийг Эрүүгийн хуулийн тусгай ангийн 18.6 дугаар зүйлийн 1 дэх хэсэгт заасан гэмт хэргийн хөөн хэлэлцэх хугацаа дууссан үндэслэлээр Шүүх хэрэгсэхгүй болгосон байдаг.
Шүүгдэгч С.Бүрэнтөгс мөрдөн шалгах ажиллагааны үед гэрчээр мэдүүлэхдээ: "...би Э.Аззаяа даргатай цуг ажиллаад 2 жил орчим болж байна, Н.Баярсайхан даргатай цуг ажиллаад 1 жил орчим хугацаа өнгөрч байна.
Хоёулаа миний шууд удирдах албан тушаалтан байгаа юм. Миний хувьд Э.Аззаяа, Н.Баярсайхан нартай нийлж аж ахуй нэгж байгууллагыг дарамталсан зүйл байхгүй.
Миний хувьд аж ахуй нэгж байгууллагын төлөөлөл нь ирэхээр нь би гэрчилгээг чинь бэлдчихсэн, та өөрөө Н.Баярсайхан дарга дээр орж гарын үсгийг нь зуруулж учраа ол гээд ихэвчлэн оруулдаг байсан. Аж ахуй нэгж байгууллагын зөвшөөрлийн гэрчилгээ, мэдэгдлийг би аваад орохоор янз бүрийн шалтаг хэлээд, шаардлагагүй бичиг баримт нэхээд байхаар нь үлдээгээд гарчихдаг. Аж ахуй нэгж байгууллагын захирал, удирдлагууд өөрсдөө Н.Баярсайхан даргатай ирж уулзаад гэрчилгээ, мэдэгдэл дээрээ гарын үсэг зуруулаад аваад ирэхээр нь миний бие хүлээж аваад тамгын газрын дарга дээр орж тэмдэг даруулж баталгаажуулаад аж ахуй нэгж байгууллагад нь өгдөг.
2017 оны 10 дугаар сарын эхээр Э.Аззаяа дарга, Н.Баярсайхан дарга нар намайг Э.Аззаяа даргын өрөөнд ороод ир гэхээр нь би ороход гадны нэг танихгүй хүн байсан. Тэр хүнийг Э.Аззаяа дарга гарч бай гээд гаргасан.
Улмаар Э.Аззаяа дарга надад хандаж, "гражид байгаа миний 0111-УБЭ улсын дугаартай Бенз маркийн хар машины багажид байгаа тортой юмыг аваад ир” гэсэн. Юу байгаа талаар асуухад дуугараагүй. Ингээд би гараад ажлын гадна талын зогсоол дээр байсан машиных нь багажид байсан цагаан тортой байсан санагдаж байна. Уг эд зүйлийг аваад Э.Аззаяа даргын өрөөнд орох гэхэд өрөөндөө байгаагүй Н.Баярсайхан даргын өрөөнд сууж байсан.
Намайг "цүнхээ аваад ороод ир” гэхээр нь өрөөндөө орж өөрийн албан хэрэгцээнд ашигладаг бор өнгийн гар цүнхээ аваад Н.Баярсайхан даргын өрөөнд ороход Э.Аззаяа даргатай сууж байсан. Намайг буцаад гарч бай гэхээр нь гарсан. Тэгээд удалгүй буцаад ороход "За энэ... Э.Аззаяа дарга, Н.Баярсайхан дарга хоёрын чинь өгч байгаа юм шүү”, гэхээр нь "Яалаа гэж өгч байгаа юм бэ” гэхэд "Дуугүй ав” гэж надад хэлсэн.
"Ер нь бол чамд бодлого танилцуулна, тэрийг чи хэрэгжүүлээрэй, наадах чинь Элдэв-Очир та хоёрынх шүү” гэж хэлсэн. Тэгэхээр нь би Элдэв-Очир ахын өрөөлүү орж "миний цүнхэн дотор юм хийчхээд шахаад байна яах ёстой вэ” гэхэд, Элдэв-Очир ах маш их гайхсан, би ч гэсэн маш их гайхсан.
Ингээд өрөөнд их хэмжээний мөнгө байлгахаас айгаад Элдэв-Очир ахын машины ард торонд хийгээд үлдээсэн. Тэр өдөр ажил тартал энэ мөнгийг яах ёстой талаар Элдэв-Очир ах бид хоёр их эргэлзээд хоорондоо байнга ярилцаж байсан.
Тэгээд бид хоёрт хийсэн хууль бус үйлдэл байхгүй, удирдлагуудаас өгсөн мөнгийг авчихвал юунд орох бол, яах бол гэж хоорондоо ярилцаж байгаад уг мөнгийг хувааж авахаар болоод бид хоёр тав, таван сая төгрөг хувааж авсан…
Энэ мөнгийг өгснөөс хойш Н.Баярсайхан дарга намайг өрөөндөө дуудаад чи тахианы мах импортолдог аж ахуй нэгжүүдийг шахаж дарамт үзүүл, маш олон төрлийн бичиг баримтууд шаардаад бай гэж надад хэлэхээр нь би үгүй ч гэж хэлээгүй, за ч гэж хэлээгүй.
Мөн тахианы мах импортолдог, аж ахуй нэгжүүдэд мал эмнэлгийн шаардлага гаргаж ирж тавь гэдэг байсан. Тэр шаардлагыг нь би одоо болтол хийгээгүй. Э.Аззаяагийн машины багажнаас авсан том цагаан тортой нэлээн их хэмжээний мөнгө байсан.
Гаднаас нь харахад боодолтой 20 000 төгрөг, 10 000 төгрөгийн дэвсгэртүүд харагдаж байсан.
Уг тортой мөнгөнөөс Элдэв-Очир бид хоёрт багахан хэсгийг нь өгсөн үлдсэн мөнгийг нь хэд болохыг мэдэхгүй байна. Э.Аззаяа, Н.Баярсайхан дарга хоёр хувааж авсан байх. Яаж хувааж авсан талаар нь бол нарийн сайн мэдэхгүй...” хэмээн мэдүүлжээ.
Үргэлжлэл бий...
Х.Онон
Эх сурвалж: Zuv.mn
Сэтгэгдэл байхгүй байна.