Төрийн албан хаагчдыг, тэр дундаа төрийн өндөр албан тушаалтнуудыг эх үүсвэр нь тодорхойгүй элдэв чамин үнэт эдлэл, данагар данагар алтан бөгж, брэндийн цагаа тайлахыг Ерөнхий сайд У.Хүрэлсүх нэгэнтээ үүрэгдсэн байдаг.

Тэрээр нэгэн хурал дээр хэлэхдээ "Том том алтан цаг зүүдгээ боль, хүн цохиод алчихмаар том том алтан үзэг барьдгаа больцгоо. Ядарсан Монголын сая төгрөгийн цалинтай төрийн албан хаагчид мянга, мянган долларын цаг, бөгж зүүгээд, үзэг бариад сууж байна. Тийм алтан эдлэл зүүх дуртай юм бол ажлаасаа чөлөөлөгдөөд зүүцгээ” гэж хатуу сануулсан.

Гэвч Ерөнхий сайд У.Хүрэлсүхийн үгэнд ордог өндөр албан тушаалтан цөөхөн бололтой. Харин ч эсрэгээрээ үнэт эдлэлээрээ өөр хоорондоо өрсөлдсөөр өдөр, цагийг өнгөрөөж байна. Тэр ч байтугай төрийн байгууллага, төрийн албан хаагчдын өмсгөл зүүсгэлтэй холбоотой үг хэллэг, хоржоонтой яриа хөөрөө хүртэл гарчхаж. Жишээлбэл, "булган шубаны шоу үзье гэвэл татварын алба тарахад үүдэнд нь зогсож бай” гэж байх юм.

Тэгвэл түүнээс дутахааргүй алба хаагч Мэргэжлийн хяналтын газарт байдаг бололтой. Гэхдээ тэд татварынхан шиг үнэтэй гоёмсог шубаар биш, үнэтэй брэндийн алтан бөгжөөр гоёдог аж. Тодруулбал, НМХГ-ын дарга Л.Эрдэнэчулуун Нийслэлийн онцгой комиссын хуралдаанд оролцохдоо мөнөөх У.Хүрэлсүхийн хэлдэг шиг алтан бөгжөө гайхууланхан зүүгээд ирсэн нь олны нүдийг оройд нь гаргаадхаж.

Учир нь НМХГ-ын дарга Л.Эрдэнэчулууны зүүсэн алтан бөгж нь зүгээр ч нэг алтан бөгж биш бүр үнэт эдлэлийн брэндүүд дундаа толгой цохидог "Pure Alhambra ring” гэх шар алтан бөгж байх юм. Тэрхүү бөгжийг худалдаалдаг үнэ 4.150.00 ам.доллар юм. Манай төгрөгөөр бол 10 гаруй саяыг даваад талийна гэсэн үг.

Ийм л үнэтэй бөгжийг ядарсан Монголын сая төгрөгийн цалинтай төрийн албан хаагч хурал дээр хуруундаа зүүгээд явж байна. Гэтэл ард иргэд 10 саяын бөгж зүүх байтугай 10 хоногийн хоолоо олох гэж зүдэрч сууна.

Ямартай ч үнэтэй бөгжөө гэрэл цохиулсан НМХГ-ын дарга Л.Эрдэнэчулуун ямар эх үүсвэрээр "Pure Alhambra ring” худалдаж авснаа тайлбарлах л болж дээ.

А.СЭЛЭНГЭ

АNEWS.MN