Америкийн цэргүүдийг Өмнөд Солонгост байлгах зардлын талаар хийсэн яриа хэлэлцээний гурав дахь үе шатанд ахиц дэвшилд хүрч чадсангүй гэж БНСУ-ын Гадаад хэргийн яамны хэвлэлийн мэдээлэлд дурджээ. Хоёр орны төлөөлөгчдийн хэлэлцээ Сөүл хотод хоёр өдөр үргэлжилсэн байна.

 

Хэвлэлийн мэдээлэлд дурдсанаар, Америкийн тал цэргийн зардлыг хуваарилах тухай гэрээнд шинэ заалт оруулахыг шаарджээ. Уг заалтад БНСУ-ын гаргах хувийг огцом нэмэгдүүлсэн байна. Харин Өмнөд Солонгосын талын хувьд зардлыг үндэслэлтэй нэмэгдүүлж, одоо хэрэгжиж буй гэрээний хүрээнд хүлээн зөвшөөрөгдсөн байх ёстой гэж мэдэгдэж байгаа аж.

Өмнөд Солонгост 28 мянган цэрэг байлгахад Вашингтон жилд 5 тэрбум ам.доллар зарцуулдаг учраас Өмнөд Солонгосын гаргах зардлыг ихээхэн нэмэгдүүлэх шаардлагатай гэж Америкийн тал өнгөрсөн жил мэдэгджээ. Сөүлийн гаргах зардлыг энэ онд 8.2 хувиар нэмэгдүүлж, 1.04 их наяд вон буюу 915 сая ам.доллар болгосон байна.

Америкийн тал Өмнөд Солонгосын гаргах зардлыг үүнээс бараг тав дахин нэмэгдүүлж, 4.7 тэрбум ам.доллар болгохыг шаардсан гэж телевизийн YTN суваг энэ сарын 7-нд үндэстнээ нэгтгэх асуудал хариуцсан парламентын хорооны дарга Юн Сан Хёны мэдэгдлээс иш татан уламжилжээ.

АНУ-ын цэргүүд Солонгосын дайны үеэс хойш Өмнөд Солонгост байрлаж байгаа бөгөөд цэргүүдийг байлгахыг нөхцөлийг хоёр орны хооронд 1950 оны нэгдүгээр сарын 26-нд байгуулсан батлан хамгаалахын туслалцааг харилцан үзүүлэх тухай гэрээгээр зохицуулдаг аж.