Шүүхийн шинэчлэл нь Польш улсыг Европын Холбооноос /ЕХ/ гарахад хүргэж болзошгүй гэж тус улсын Дээд шүүхээс мягмар гарагт гаргасан мэдэгдэлд дурджээ.

 

Польшид шүүхийн шинэчлэлийн талаарх маргаан хэдэн жилийн турш үргэлжилж байгаа юм. Эрх баригч "Хууль ба Шударга ёс” /PiS/ нам  шүүх тогтолцоог нөлөөндөө оруулж, хараат бус байдлыг нь хязгаарлахыг оролдож байна гэж Польшийн болон гадаадын шинжээчид үзэж байгаа аж. "PiS” намаас парламентад сонгогдсон гишүүд "эрх мэдлээ хэтрүүлсэн шүүгчдийг сахилга баттай болгох" зорилгоор шүүх болон Дээд шүүхийн тухай хууль тогтоомжид оруулах ээлжит нэмэлт өөрчлөлтүүдийн төслийг өнгөрсөн долоо хоногт парламентад өргөн барьжээ. Энэ нь сөрөг хүчин болон шүүх байгууллагынхны дургүйцлийг ихээхэн төрүүлсэн байна.

"Энэхүү хуулийн төслийг санаачлагчид ЕХ болон Польшийн хууль тогтоомж хоорондоо зөрчилдөх эхлэлийг тавьж байгаа бөгөөд эцсийн дүндээ ЕХ-г орхихоос аргагүйд хүргэнэ” гэж тус улсын Дээд шүүхийн мэдэгдэлд дурджээ. Санал болгож буй өөрчлөлтүүд нь "сөрөг үнэлгээг хүртэх ёстой” бөгөөд "Польшийн шүүхийн хараат бус байдалд бодит аюул учруулж байна" гэж тус улсын Дээд шүүх үзэж байгаа аж.