Улсын онцгой комисс хуралдаж, өмнөд хөршид шувууны томуу илэрсэнтэй холбоотойгоор гахай, тахианы мах, тэжээл, өндөг импортоор оруулахыг түр хугацаагаар хориглох саналыг Засгийн газарт оруулж байж л шийдвэр гарах юм гэнэ.

Жингүйдлийн байдалтай, манарчихсан юм шиг, удаан гэхэд дэндүү удаан улстөрчдөд хурдал, хурдал, хурдал гэж хэлье.

Та нөхдийг "Царцаа шоргоолжны үлгэр” ярьж байх зуурт тахиа шувууны мах нь зулзага, өндөг энэ тэртэйгээ бөөн бөөнөөр ороод ирнэ.

Нэг ажил хийхдээ нэгнийхээ ажлыг үгүйсгэсэн одоогийн залуусын ярьдгаар бол "шургуу” зүйл ярьж байх юм. Өмнө нь Замын-Үүдийн хилийн боомтын халдвар хамгааллын асуудал ярвигтай болсон талаар хэн ч юу ч дуугараагүй хэрнээ гэнэт юу болоод "Ярвигтай” болсон боомтуудад ажиллах баг нисдэг тэргээр гарна гээд бас л нийгмийн сэтгэл зүйг цочроогоод эхлэв ээ.

Улсын онцгой комисс хуралдахдаа одоо, ирээдүй, өнгөрсөн гурвыг харж хуралддаггүй болж таарч байна уу. Нэг асуудал гарах бүрт л хуралдаад байвал цаг хугацаа биднийг хүлээхгүй нь мэдээж. Эсвэл Комиссын  та нөхөд балчирдаад, мэдлэггүйдээд байна уу...

Өнөөдрийн хуралдаанаар мөнгөний тухай ярьж шийднэ гэж байгаа. Жаахан алсыг харж сэтгэ л дээ, улсын онцгой комиссынхоон...

Коронавирус, шувууны ханиад хоёр та нөхдийн хэн нь хэн бэ гэдгийг шалгаад эхэлчихсэн гэдгийг анхаарахад илүүдэх юун.

С.Туул

Эх сурвалж: erennews.mn