Цар тахлын үед мөнгөөр тасрахгүй яваад байгаа нь сар болгон сая саяар урамшуулал авдаг Олимпийн медальтнуудаас гадна урлагийнхан аж. Тэд тамирчид шг тогтмол авахгүй ч тэмдэглэлт баяр бүрээр подхийсэн мөнгө "цохиод” л байна. Урлагийханыг төсвийн мөнгөөр байнга баярлуулдаг  "буянтан” нь НСУГ-ын дарга Ж.Дамдинцэрэн юм. Тус газар Цагаан сарын баярт зориулсан "Монголын их билэгшээл” нэвтрүүлэгт  55 сая төгрөг гаргасан агаад тэр мөнгөнөөс урлагийн томчууд ихийг, хөөрхий тоглогч хүүхдүүд өчүүхнийг хүртсэн байдаг. Эх зохиогч найруулагчид багтан продюссерээр ажилласан МУГЖ Б.Жаргалсайханд 15 сая, харин ерөнхий найруулагч Төрийн соёрхолт Н.Наранбаатарт бүр 20 сая төгрөг ноогдсон.  Тэдний дэргэд зохиогчоор ажилласан СГЗ Г.Золжаргалд хамаагүй бага буюу 3,5 сая төгрөг авчээ. Тэгвэл "Монголын их билэгшээл”-ээс гадна цагаан сард зориулсан бас нэгэн нэвтрүүлгийг НСУГ бэлтгэн явуулж зардлыг нь хотоос гаргуулсан байна. Сар шинийн баяр зориулсан энэ нэвтрүүлэгт уран бүтээлчид болон хамба лам Чойжамц, дархан аварга Б.Бат-Эрдэнэ, улсын заан Д.Долгорсүрэн нарын "өв тээгчид" оролцжээ.  Ж.Дамдинцэрэн уран бүтээлчидэд гар татаагүй нь ханшнаас илт харагдана. Хамгийн их мөнгө буюу 10 саяыг дэлхийд алдартай гэх "Ху” хамтлаг авчээ. Тэд цар тахлын үед ч ядарсан төсвөө бодоод үнээ буулгадаггүй аж.  Хажууд нь "Хөсөгтөн” хамтлаг даруухан загнасан байна. Алдарт Ука бүжигчдийн хамт 4,5 саяар дуулж бүжсэн бол "гайхамшигт” гурвал Мөнхбат, Банзрагч Бурмаа нар тус бүр нэг саяыг авчээ.  Урлагийн томчуудад энэ мэтээр сая саяар өгсөн атлаа 113-р цэцэрлэгийн хүүхдэд нэг саяыг хялайлгасан аж. Сайн дурыхнаас "авьяаслаг Монголчууд"-ын Шижирбат "дээгүүр жаалж" СТА нараас их мөнгө авсан байна. Өв тээгчид "дэндүү том” зиндааныхан тул  нэр хааж 200-300 мянгыг өгөөд салжээ.  Ер нь НСУГ-ын дарга залуу хотын даргаас хүссэн мөнгөө авч чаддаг гэдгийг энэ мэт үйл явдал болон "Ковидгүй зуны төлөө” хэмээх уриат 358 саяын төсөвтэй "Хотын соёл” аянаас улам бүр харагдах боллоо.