"МИАТ” ТӨХК-аас 2023 онд 9.5 тэрбум төгрөгийн үнэлгээтэй "Зорчигчийн хоол” катерингийн үйлчилгээ үзүүлэх гүйцэтгэгч компанийг сонгон шалгаруулах тендерийг хоёр удаа зарлаж, "МИАТ” ТӨХК-ийн Гүйцэтгэх захирал Б.Мөнхтамир нь 2023 оны 12 дугаар сард "Ред рок катеринг” компанитай гэрээ байгуулсан талаар манай сайт мэдээллсэн. Тэгвэл уг асуудлын мөрөөр АТГ-аас шалгалт явуулж нэр бүхий албан тушаалтнуудад эрүүгийн хэрэг үүсгэн шалгаж, албан тушаалыг нь түдгэлзүүлжээ. Үүнээс гадна Монгол Улсын хилээр гарах хориг тавьжээ.

 

Хэргийг тодруулбал Нийслэлийн прокурорын газраас Эрүүгийн хэрэг үүсгэж яллагдагчаар татан шалгаж байгаа "МИАТ ТӨХК"-ийн бизнес удирдлагын газрын захирал Н.Батдарь, Санхүү удирдлагын газрын дарга Н.Цэгцийг албан тушаалаас нь түдгэлзүүлж, хилийн хориг, Захиргаа удирдлагын газрын захирал Э.Мөнх-Марал, Бүхээгийн үйлчилгээний албаны дарга дарга Ж.Амар-Эрдэнэ, Үйлчилгээний чанар стандартын хэлтсийн дарга Б.Цэгмэд нарыг албан тушаал түдгэлзүүлж, хилийн хориг тавих саналыг Хан- Уул дүүргийн Эрүүгийн хэргийн анхан шатны шүүхэд гаргаж шүүх хуралдаж дээрх нэр бүхий тендерийн үнэлгээний хорооны гишүүдийн албан тушаалыг нь түдгэлзүүлж, хилийн хориг тавих прокурорын санал үндэслэлтэй гэж үзэн хүсэлтийг хангаж шийдвэрлэсэн байдаг.

Ийнхүү "МИАТ ХХК"-ийн удирдах албан тушаалтнууд шалгагдаж албан тушаалаас нь түдгэлзүүлсэн тухай мэдээлэл гарнаас хойш МАН-ын цагаан байраар уг албан тушаалд дараагийн горилогч нар эргэлдэж, хөөцөлдөж эхэлсэн сурагтай.

Үнэлгээний хорооны гишүүд нь эрүүгийн хэргээр шалгагдаж бүр хилийн хориг хүртэл тавиулчихаад байхад гишүүдийн санал, шийдвэрийг тамгаараа баталгаажуулдаг МИАТ ТӨХК-ийн гүйцэтгэх захирал Б.Мөнхтамир хэргээс мултарч асуудлын ард үлдэх вий гэсэн болгоомжлол байна. Ийнхүү МИАТ-ийн нэр бүхий удирдлагуудыг албан тушаал, авлига хээл хахуулын хэрэгт хууль хяналтын байгууллагаас шалгаж эхэллээ. Хэрхэн яаж хариуцлага тооцохыг цаг хугацаа харуулна.