Wi-Fi-гаар утас цэнэглэдэг болох ойрхон байна
Вашингтоны Их Сургуулийн судлаачид Wi-Fi сүлжээгээр төхөөрөмжийн баттерейг цэнэглэх туршилтыг амжилттай хийжээ.
Өдөр тутмын амьдралд маш олон тооны төхөөрөмжүүд ашиглагддаг болж байгаа өнөөгийн нөхцөлд утас, залгуур хэрэглэдэггүй, илүү хялбар цэнэглэх арга шаардагдаж байгаа.
Тэгвэл судлаачид Wi-Fi сигналаас тогтмол хүчдэл (DC) үүсгэх мэдрэгчүүдийг олон төрлийн төхөөрөмжинд суулгаж туршсан байна.
Ингэхийн тулд Wi-Fi роутер нь зөвхөн сүлжээнд холбохоос гадна цэнэглэх үүрэгтэй болж төхөөрөмжүүдийн баттерейнд сигналыг хүлээн авч хүчдэлд хувиргах мэдрэгчүүд суух шаардлагатай.
Харин цэнэглэх төхөөрөмж нь роутерээс 8.5 метрийн радиус дотор байх хэрэгтэй гэнэ.
Энэ санааг амьдралд хэрэгжүүлэхийн тулд стандарт тогтоогчид зарим нэг хязгаарлалтанд өөрчлөлт оруулах хэрэгтэй болно. FCC (Federal Communications Commission) байгууллага Wi-Fi роутерын гаралтын чадлыг нэг ваттаас хэтрэхгүй байхаар тогтоосон байдаг.
Тэгвэл iPhone цэнэглэхэд 5 ватт, Macbook Air цэнэглэхэд 45 ваттын чадал хэрэгтэй болно.
Дээрх технологийг хэрэглээнд оруулахын тулд энэ стандартыг өөрчлөх хэрэгтэй болж байгаа юм.
Хэрвээ энэ технологи амьдралд хэрэгжвэл анхны залгууртай цэнэглэгчээс илүү гарсан утасгүй шийдэл болно. Өмнө нь гарч байсан утасгүй шийдлүүд төдийлөн амжилт олохгүй байгаа юм.
Эх сурвалж: Wired.Com