"BB" караоке хууль зөрчсөөр л байх уу?

2015/06/22

Энэ удаагийн шөнийн сурвалжлагаараа Сүхбаатар дүүргийн 6 дугаар хорооны нутаг дэвсгэрт байрлах "BB” караокег онцолж байна. Тус караоке нь цаг хэтрүүлэн ажилладаг, шөнийн 00 цагаас хойш архи, согтууруулах ундаагаар үйлчилдэг зэрэг хуулийг "гууль” болгосон үйлдэл удаа дараа гаргасан талаар иргэдээс удаа дараагийн гомдол ирсний дагуу манай сурвалжлах баг "BB”-г зорьсон юм.

Өдөр очиход төмөр хаалга нь хүний нүднээс далд, хаяг нь тус байрны буланд жижгээр биччихсэн, эргэн тойрноо хянадаг бололтой тал тал тийш харсан камертай их л нууцлаг газар байлаа. Зохион байгуулагчтай нь уулзахаар шөнийн 23 цаг 40 минутад очиход хаалга үүдээ нээчихсэн байрны буланд байрлах жижиг хаяг нь тодоор гэрэлтэн уушийн газартаа уриалан дуудаж байгаа мэт харагдав.

Дотогш орон үйл ажиллагааных нь талаар тодруулахад зохион байгуулагч залуу нь "Манайх шөнийн 00 цаг хүртэл л ажиллах үүрэгтэй, 00 цагаас хойш архи, согтууруулах ундаагаар үйлчлэхгүйгээр хүмүүсээ шахаад л (цаг сунгалгүй, хааж байна гэдгээ мэдэгдэн үйлчлүүлэгчээ гаргах) хүлээлгийн минут гээд 00 цаг 30 минутад хаадаг” гэлээ. Хүн дуулах чимээ сонсогдохгүй байсан учир танайх одоо үйлчлүүлэгчгүй байгаа юм уу гэхэд "Тийм, одоо ингэсгээд л хаах гээд байж байна.” гэв.

Яриа авчихаад гадаа нь байж байтал өнөөх одоо хаах гэж байна гэсэн газрын үүдээр хэдэн хүн орж харагдлаа. Шөнийн 00 цагт хаадаг үүргээ мэддэг байгууллагын үйл ажиллагаа харин ч шөнө дунд эхэлдэг бололтой. Хэдийгээр зохион байгуулагч нь наанаа 00 цагт хаадаг гэсэн боловч начир дээрээ өөр байгаа гэдгийг бид батлахын тулд тэднийхээр үйлчлүүлэхээр орж буй хүмүүсээс асуухад "Өө наад караоке чинь үүр цайтал ажилладаг шүү дээ, юу гэж шөнийн арван хоёр цагт хааж байдаг юм. Наадуул чинь худлаа ярьж байгаа юм” гэсэн хариулт өглөө.

Үг үйлдэл нь хол зөрүүтэй "BB” караокены талаар албаны хүнээс тодруулахаар Сүхбаатар дүүргийн 6 дугдугаар хорооны Цагдаагийн хэлтэс дээр очлоо. Албаны хүний хэлснээр "Саяхан бас цаг хэтрүүлсэн болон архи, согтууруулах ундаагаар үйлчилсэн гэх үндэслэлээр "BB” караокед зөрчлийн тэмдэглэл биччихээд одоо эзэн холбогдогч болох н.Тэнгисболд гэх залууг дуудчихаад л байж байна даа.”

-"BB” караоке тухай бүртээ торгуулиа төлөөд явдаг уу?

-Торгуулиа удааж өгдөг. Хуулиараа бол баар, шөнийн цэнгээний газар нь пүрэв, баасан, бямба гарагуудад 00 цагаас хойш архи, согтууруулах ундаагаар үйлчлэхгүйгээр 03:00 цаг хүртэл үйл ажиллагаа явуулах эрхтэй. Караоке бол 00 цагаас хойш ажиллах ёсгүй.

-"BB” караокены хувьд одоогоор ямар зөрчил илрүүлчихээд байгаа вэ, цаашлаад ямар арга хэмжээ авах вэ?

-Манайх баасан гараг бүр нэгдсэн болон хэсэгчилсэн арга хэмжээ зохион байгуулж, Архидан согтуурахтай тэмцэх хуулийн 7.8-д заасны дагуу цаг хэтрүүлэн ажиллаж, архи согтууруулах ундаагаар үйлчилж байгаа байгууллагуудыг 250 мянган төгрөгөөр торгож, зөрчлийн тэмдэглэл бичиж, арга хэмжээ авдаг.

Гурваас дээш зөрчил гаргасан тохиолдолд архины тусгай зөвшөөрлийг нь хураах саналыг нийслэл рүү хүргүүлдэг. "BB” караокены хувьд энэ он гарснаас хойш хоёр удаагийн зөрчил илэрсэн. Гэхдээ энэ "BB” караокед би бараг арга хэмжээ болгон дээр очдог. Дотор нь дуу цангинаад байгаа хэрнээ гаднах камераараа харчихаад цагдаа хувцастай хүнийг ерөөсөө оруулдаггүй. Дээрийн арга хэмжээн дээр энгийн хувцастай хүнээр хаалгыг нь тогшуулж байж дотогш орсон.

-Дотогш ороход ямар байдалтай байсан бэ?

-Тэр үед 02 цаг 36 минут болж байсан. Биднийг ороход зургаан өрөөнд хүнтэй байсан бөгөөд өрөө бүрд нэг шил архи, есөн шил пивотой үйлчилж байсан.

-Төрийн цагдаа хүнд хаалга үүдээ ч тайлж өгөхгүй байгаа энэ газрыг цаашид өөгшүүлээд л байх уу?

-Бид хуульд заасны дагуу гарсан зөрчил дээр нь л арга хэмжээ авах үүрэгтэй. Зөрчлийг нь илрүүлчихээд, зөрчлийн тэмдэглэл бичээд, тухайн газрын зохион байгуулагчаар нь ч юм уу гарын үсэг зуруулах ёстой байдаг.

Юутай ч Цагдаагийн байгууллагын дээрх эх сурвалж нэрээ нууцлахыг хүссэн бөгөөд цадигаа алдсан энэ байгууллагын талаар ийм тайлбар хэллээ. Тиймээс бид хэн гэгч ямар эрхтэн дархтан нь ийнхүү хуулийг "гууль” болгон замхаруулдаг талаар тодруулахад хуучнаар "Lanclub” байсан одоогийн "Grand BB Royal” рестораны захирал бүсгүй дээрх караокег ажиллуулдаг гэсэн баттай мэдээлэл авсан юм.

Биднийг ресторан дээр нь очин "Захиралтай чинь уулзаж болох уу” гэж асуухад "Байхгүй байна. Өөрөө хэн бэ, хаанаас яваа вэ” гээд эгээ л мөрдөн байцаагч аятай аашилж байлаа. Арга ч үгүй биз дээ, хууль зөрчдөг байгууллагын эзэн хэр баргийн хүнтэй уулздаггүй л байлгүй.

Эх сурвалж: