Шинэ Зеландын Өмнөд Аукландад саяхан таван настай бяцхан хүү сургууль руугаа явах замдаа машинд мөргүүлж хүнд гэмтжээ. 22 настай Харман Синх гэх оюутан залууг очиход хүүгийн толгойноос цус гарч байсан тул Синх шашны хатуу хуулиа зөрчин тюрбан алчуураараа хүүгийн толгойг боож өгчээ. Удалгүй түргэн тусламж ирж, хүүг ойролцоох эмнэлэгт хүргэсэн байж. Синх "Зам дээр бяцхан хүү хэвтэж байсан. Хүүгийн толгойноос цус алдаж байсан учраас тюрбан алчуураа тайлж, боосон. Тухайн үед надад бусад зүйлийн талаар бодох сөхөө байгаагүй. Зөвхөн хүүд л туслахыг хүссэн” гэжээ. Сикхизмийн шүтлэгтэй эрчүүд олон нийтийн газар тюрбан алчуураа авахыг хатуу хориглодог аж. Харман Синх шашны сургаалиа зөрчсөн ч сайхан сэтгэл гарган хүүгийн амийг аврахад тусалсан хэмээн олон нийтийн зүгээс талархал хүлээжээ.

Синхийн энэ жишээ болохгүй юм гэж энэ орчлонд үгүй гэдгийн нэг баталгаа мэт. Амьдарч байхдаа бид олон зүйлд утга шингээж өөрийн сонирхдог, хүсдэг хүсдэггүй зүйл хэмээн зааг тавьдаг. Бүр хэн нэгнийгээ сайхан муухай хэмээн тодорхойлдог. Гэвч сайн гэж санасан, муу гэж бодсон зүйл хоёрын хооронд асар их зөрүү байдгийг ухаарах үе бас тохиолддог. Харин хагацал, үхлийн өмнө бид хүн гэдэг ганцхан зүйл үнэтэй болохыг мэдэрдэг. Түүний нэгэн адил хүсвэл, хэн нэгэнд туслах сайхан сэтгэл байх юм бол болохгүй, зүйл гэж үгүй билээ. Тэр тусмаа бусдад туслахын тулд, хэн нэгэнд хэрэгтэй тусламжийг өгөхийн тулд заавал бурхан байх албагүй юм.

Г.ДЭЛГЭРЦЭЦЭГ