Тайландад Ойрхи Дорнодын амьсгалын замын хам шинж буюу МЕRS вирусийн халдвар авсан анхны тохиолдол энэ сарын 19-нд бүртгэгдсэн талаар өмнө нь бид мэдээлж байсан.

Тэгвэл MERS вирусийн халдвар авсан гэж оношлогдсон цорын ганц өвчтөн эмчлэгдлээ хэмээн ВВС мэдээллээ.

Хамгийн сүүлд хийсэн шинжилгээгээр өвчтөний биенээс коронавирусийн ямар ч шинж тэмдэг илрээгүй байна. Гэсэн хэдий ч өвчтөнийг хэсэг хугацаанд тусгаарлах аж.

Коронавирусийн анхны тохиолдол Бангкокт зүрхний эмчилгээ хийлгэхээр ирсэн Оман улсын иргэн, 75 настай эрэгтэйгээс илэрсэн. 

Бангкокт түүнтэй хамт ирсэн гэр бүлийн гурван гишүүнээс гадна түүнтэй ойр байсан, нэг нислэгээр ирсэн зорчигчид зэрэг 36 хүнийг халдварт өвчин судлалын эмнэлэгт шинжилгээнд хамруулсан талаар Тайландын Эрүүл мэндийн сайд хэллээ. Ямартай ч тус улсад одоогоор MERS-ийн шинэ тохиолдол бүртгэгдээгүй байна.

Сануулахад өнгөрсөн сард Өмнөд Солонгост МЕRS-ийн халдвар тархсанаас хойш одоогийн байдлаар 32 хүн тус өвчний улмаас амь насаа алдаж, нийт 182 хүн халдвар аваад байгаа юм.

Эх сурвалж: ВВС