Порошенко: Украин НАТО-д элсэхийн тулд 7 жил шаардлагатай
Украин Умард Атлантын гэрээний байгууллагын /НАТО/ гишүүн болох цаг хараахан болоогүй. Тус байгууллагын бүх шаардлагыг биелүүлэхэд 6-7 жил шаардагдана гэж Украины Ерөнхийлөгч Петр Порошенко Corriere della Sera сонинд өгсөн ярилцлагын үеэр хэлжээ.
Тэрбээр "Бид улс орны эдийн засаг, нийгэм, захиргааны салбарт томоохон шинэчлэл хийх тал дээр ажиллаж байгаа. Төлөвлөсөн, хийх шаардлагатай маш олон ажил бий. НАТО-д элсэх шалгуурыг хангахад наад зах нь 6-7 жил шаардлагатай. Бид бэлэн болсон үедээ НАТО-д гишүүнээр орох талаар Украины ард түмний дунд бүх нийтийн санал асуулга явуулна" гэж хэлсэн байна.
Дэлхий нийтийн аюулгүй байдлыг хангах хүчтэй байгууллага НАТО-гоос өөр байхгүй гэдгийг Порошенко онцолсон юм.
Сануулахад ЗХУ-аас дөнгөж тусгаар тогтносон 1991 онд Украин улс НАТО-гийн түнш орон болсон. Украин улс НАТО-тай нягт хамтран ажилладаг бөгөөд уг холбооны Энх тайвны төлөө түншлэлийн хөтөлбөрт идэвхтэй оролцдог.
Цэргийн ямар нэг эвсэлд орохыг хориглосон боловч хамтран ажиллахыг зөвшөөрөх хуулийг Украины парламент 2010 оны гуравдугаар сард баталсан.
Украины зүүн нутагт Засгийн газрын цэргүүд босогчидтой тэмцэж байгаа энэ үед, НАТО-гийн гишүүн болоход чиглэсэн шинэчлэлийн замыг тавихын тулд Украины эвсэлд үл нэгдэх статусыг хүчингүй болгох хуулийн төслийг батлахыг Ерөнхий сайд Арсений Яценюк парламентдаа уриалж байсан юм.
НАТО гэж юу вэ?
Энэ бол 1949 оны дөрөдүгээр сарын 4-д Умард Атлантын гэрээгээр байгуулагдсан, социалист орнуудын ялангуяа хуучин Зөвлөлт Холбоот Улсын эсрэг чиглэсэн хүйтэн дайны үед байгуулагдсан АНУ болон бусад баруун Европын орнуудын цэрэг-улстөрийн эвсэл.
Хүйтэн дайнаас хойш дэлхийд АНУ-н тэргүүлэх нэг тэнхлэгийн бодлогыг хэрэгжүүлэх зорилго бүхий цэргийн эвсэл болсон байна. НАТО-н дүрэмд зааснаар энэ байгуулагын зорилго нь гишүүн улсуудын эрх чөлөө, аюулгүй байдлыг улс төр цэрэг зэвсгийн хүчээр хангах, Европт шударга бөгөөд бат бэх энх тайван тогтоож ардчилал хүний эрх, эрх чөлөөг эрхзүйт төрийн үндсэн дээр бэхжүүлэх явдал юм.