Грекийн байдал хэрхэн эргэхийг Европ төдийгүй дэлхий дахинаа ажиглаж байна. Бие даасан "Moody's” агентлаг Грекийн зэрэглэлийг бууруулж "Caa2”-г "Caa3” болгон өөрчлөв.

Ойрын хугацаанд хөрөнгө оруулагчид Афинд тусламж үзүүлэхгүй нь нэгэнт тодорхой болсон учир ийнхүү зэрэглэл бууруулсан хэмээн тус агентлаг тайлбарлав. Дэмжлэг авахгүй тохиолдолд Грек дефолт буюу зээлийн гэрээгээр хүлээсэн үүргээ биелүүлэхгүй болохоо зарлах нь тодорхой гэж агентлагийн мэргэжилтнүүд үзэж байна.

Эдийн засгийн болон татварын өөрчлөлт хийх чадваргүй гэдгийг ч тус байгууллага онцолжээ. Долдугаар сарын 5-ны өдөр Грект бүх нийтийн санал асуулга явагдаж олон улсын санхүүгийн байгууллагуудын саналыг хүлээн зөвшөрөх эсвэл үгүй гэсэн хариулт өгөх ёстой. Европын холбоо, Европын төв банк болон Олон улсын валютын сан хатуу хэмнэлтийг санал болгож байгаа билээ.

Үүнтэй зэрэгцээд Грекийн Ерөнхий сайд Алексис Ципрас эдгээр байгууллагын ажиглалтын бүлэгт захидал илгээж "эдийн засгийн өөрчлөлттэй холбоотой ихэнх саналыг хүлээн зөвшөөрлөө” гэжээ. Гэхдээ маргаантай асуудал байгааг тэрээр захидалдаа онцолсон аж. Өнөөдөр Европын холбооны сангийн сайд нар түүний энэ захидлыг хэлэлцэх юм байна.

Эх сурвалж: "The Financial Times”