Д.Цогтбаатар барилгын талбарт гэнэтийн шалгалт хийлээ
Өнөөдөр Барилга, Хот Байгуулалтын сайд Д.Цогтбаатар, БХБЯ-ны БЧААБГ-ын дарга Ц.Ганбат нар "Барилгын талбайн хөдөлмөр аюулгүй байдал, эрүүл ахуйн шаардлагын хэрэгжилт”-ийн байдалтай танилцах, үнэлэлт, дүгнэлт өгөх зорилгоор барилгын ажил явагдаж байгаа зарим газарт гэнэтийн шалгалт хийсэн юм.
Үүнд "Номин” констракшны "River garden” хотхон, "Жигүүр ганд” группийн "Park view” болон сарын өмнө аюулгүй ажиллагаа хангаагүйгээс 49 настай эмэгтэй нас барьсан иргэн н.Төмөр-Очирын захиалгаар барьж буй барилга дээр очин зөрчлөө арилгаж ажиллаж байгаа эсэхийг шалгасан юм. Барилгын талбартай танилцахад River garden хотхон сайн үзүүлэлттэй байгаа ч, туул голын сав газар барилга барьж байгаа учраас чанар, баталгаандаа анхаарч ажиллахыг сануулсан. Харин Жигүүр гранд ХХК-ийн барилгын аюулгүй ажиллагаа, чанар, стандарт харьцангуй сайн байсан ч зарим нэг засаж, залруулах зүйл байгааг сайд онцолоод долоо хоногийн дотор зөрчлөө арилган шалгуулахыг үүрэгдлээ. "Иргэн Төмөр-Очирын барилга”-ын хувьд өмнөх зөрчлөө арилгаагүй, аюулгүй ажиллагааны нөхцөл хангагдаагүй байлаа. Тус компанид хандаж сайд Д.Цогтбаатар хэлэхдээ, барилгын салбарынхны үйл ажиллагааг хааж боогдуулах гэсэн дээ биш, хамгийн гол нь хүний амь насыг хамгаалах, аюулгүй орчинд ажиллуулах нөхцөлийг хангуулахын төлөө явж байна. Хүний амь насыг үл хайхран мөнгө олж болохгүй гэдгийг онцлоод зөрчлөө бүрэн арилгах долоо хоногийн хугацаа олгож, БХБЯ-наас ажлын хэсэг гарган ажилуулахаар үүрэгдсэн юм.
Сайдын зүгээс зөрчилтэй газрын үйл ажиллагаа ч тэр дариуд нь зогсоох эрхтэй, хүнийг эрүүл мэндээр хохироож болохгүй, шууд хариуцлага тооцно гэдгээ очсон газар бүртээ хатуу анхааруулав. Ийм шалгалтыг яамнаас жилдээ хэд хэдэн удаа зохион байгуулах гэнэ.
Барилгын тухай хуулийн шинэчилсэн найруулгад хариуцлагын тогтолцоог нэмэгдүүлж, төр, холбогдох байгууллага, тухайн барилгыг хариуцсан компани, ажилтан нарт хүлээлгэх хариуцлагыг тодотгож, өндөр торгууль ноогдуулах, барилгын баталгааг гурван жил байсныг 40-60 жил болгож өөрчилсөн, барилгын зуучлалын үйлчилгээг нэвтрүүлэх, барилга хоорондын зай ямар байх зэрэг олон өөрчлөлтийг хийсэн байна. "Барилгын ажилд хөдөлмөрийн аюулгүй байдал, эрүүл ахуйн шаардлага хангах нийтлэг журам” ирэх наймдугаар сарын нэгний өдрөөс хэрэгжих юм.