Энэ бүх завхарсан, задарсан байдлыг засах цаг болсон. Тиймдээ ч чангахан хууль, журам баталж авч байгаад эдийн засгаар нь хөшиж, ном журманд нь оруулахаас өөр яалтай билээ. Тэгж байж бид замын хөдөлгөөний дүрмээ ягштал биелүүлдэг, согтуу хөлчүү машин жолооддоггүй жолооч нартай болох байх.  Харин энэ хуулинд зарим нэг тэнгэрийн заалтууд байна.  

Тухайлбал,  Уг хуулийн 13.2.7-д "Эцэг эх, асран хамгаалагч, бүх шатны боловсролын байгууллагын холбогдох албан тушаалтан 10 хүртэлх насны хүүхдийг харгалзах хүнгүйгээр замын хөдөлгөөнд оролцуулахгүй байх" гэж заасан байгаа юм.  Нэг талаас нь харвал зөв.  Учир нь зам тээврийн осолд өртөж байгаа хүмүүсийн насыг харвал яах арга байхгүй 7-10 насны хүүхдүүд их жин дарна. Бага ангийн хүүхдүүд зам хөндлөн гарах гэж яваад машинд мөргүүлж амь насаа алдах, эрүүл мэндээрээ хохирох тохиолдол жил ирэх тусам нэмэгдэх хандлагатай байна.  Тиймээс хуулинд энэ мэт заалт оруулж өгөхөд буруутах юун. 

Ирээдүй хойч болсон үр хүүхдээ л хамгаалах гэж байгаа санаа шүү дээ.  Гэхдээ нөгөө талаас нь хараад үзвэл жаахан тэнгэрийн заалт.  Ядаж байхад тус хуулийн  54.6- д "Энэ хуулийн 13.2.7-д заасныг зөрчсөн нь замын хөдөлгөөний аюулгүй байдлын зөрчилд хүргэсэн бол эцэг эх, асран хамгаалагч, бүх шатны боловсролын байгууллагын холбогдох албан тушаалтныг нэг сарын хөдөлмөрийн хөлсний доод хэмжээтэй тэнцэх хэмжээний төгрөгөөр торгох шийтгэл оногдуулна” гэж заагаад өгчихөж.  

Тэгэхээр 10 болон түүнээс доош насны хүүхдээ харгалзах хүнгүйгээр замын хөдөлгөөнд оролцуулах дээрээ тулвал эцэг, эхчүүд 192 мянган төгрөгөө бэлтгэх нь. Шууд ингэж хүчиндэж боломгүй санагдах юм.  Ганцхан зам хөндлөн гараад л гэртээ орчихдог хүүхдүүд маш олон байгаа.  Тэгээд 8, 9 нас хүрчихсэн хүүхдүүд замын хөдөлгөөний талаар мэдлэгтэй болчихсон. 

Ногоон гэрлээр, гарцаар гарна гэдгээ ч мэдэх л учир­тай. Цэцэрлэгээс нь зааж байгаа шүү дээ.  Тэгэхээр ойр зууртаа бол явчихаж  чадаж байгаа. Ганцхан зам хөндлөн гарах л асуудал байна. Түүн дээр нь ангийн багш нь ч юм уу тусалдаг байхаар зохицуулмаар юм уу. Эсвэл гэр хорооллын хүүхдүүдийг өглөө аваад, оройдоо хүргээд өгчихдөг сургуулийн автобустай болмоор байгаа юм. Тэгэхгүй бол гэр бүлийн хоёрын нэг нь хүүхдээ 10 нас хүртэл гэртээ ажилгүй суухаас өөр аргагүй болох нь.  

Хоёр зэрэг хөдөлмөрлөж, хэдэн төгрөг олж байж ядуугийн эгнээ орчихгүй амьдарч байгаа манай улсад энэ заалт арай л тэнгэрийн байна. Одоо 10-аас доош настай хүүхэд ганцаараа явж байвал замын цагдаа нар барьж аваад, эцэг, эхийг нь торгоод байх нь л дээ.  Ингэж байхаар арай л өөр арга хаймаар юм даа. Ядаж л сургуулийн автобустай болох хэрэгтэй. Иргэдийнхээ халаасыг сэгсрэх арга хайснаас төрөөс хэдэн төгрөг гаргаад автобус авчихвал аятай юу.