Мексик улсын Гуадалхара хотын загасчид мянга мянган үхсэн загасыг нуурын уснаас гаргаж байна.

Орон нутгийн мэдээллийн хэрэгслүүдийн мэдээлж буйгаар Жалиско мужийн Кайтитлан нуурын эрэг дээр 40 тонн орчим цэнгэг усны попоче чаб загас угаагдан гарч иржээ.

Орон нутгийн эрх бүхий байгууллагын ажилтны хэлж буйгаар загаснууд үй олноор үхсэн явдал нь жил бүр тохиолддог, байгалийн үзэгдэл хэмээн тайлбарлаж байна. Ялангуяа борооны улирлаар улам ихэсдэг хэмээв.

Гэвч өөр мужийн эрх баригчид үүнийг орон нутгийн албан тушаалтнуудын хариуцлагагүй үйл ажиллагаанаас болсон хэмээн шүүмжилж байна.

Бохир ус цэвэршүүлэх станц бохирдсон усыг шүүж чадахгүй байгаагаас энэ  байдалд хүрсэн хэмээв.

Өнгөрсөн жил тус нуураас 200 гаруй тонн загасыг гаргасан бол энэ жилийн ажиллагаанд 100 гаруй загасчин ажиллаж байна.

Мөн орон нутгийн өөр нэгэн ажилтны хэлснээр попоче чаб загас олноор үрэгдсэн явдал нь хүн амын нягтаршилтай холбоотой гэв.

Нуурын эрэг дээр олон тоогоор гарч ирсэн тэдгээр загаснууд хүний хоол хүнсэнд тохиромжгүй ажээ.