Утасны цаанаас ч увидас маань үйлчилдэгт хүмүүс гайхдаг
Баянхонгор аймгийн харьяат Ямаандага сахиусны эзэн, гүртэн Г.Эрдэнэсувд бага, залуудаа хүчтэй халуурснаас болоод биед нь энерги хуримтлагдаж, түүнээс хойш тэрхүү энергиэрээ олон ч хүний өвчин, хуучийг эмчилсээр өдийг хүрсэн гэдгийг нь хүмүүс андахгүй. Эхлээд энергийн бариа заслын аргаар хүмүүсийн өвчинг эмчилдэг байсан Г.Эрдэнэсувд багшаасаа залагдаж ирсэн сахиустай холбогдсоноор нууц увидас нь хожим илэрч, Зурхайн хүрээлэнгээс Гүртэн хэмээх цолыг хүртэж, албан ёсоор хүлээн зөвшөөрөгджээ.
Түүний талаар үлгэр, домог шиг ам дамжсан яриа их бий. Анх зоос татаж эхлэхэд нь "Нутгийнх нь өвгөн ах "тэрэгнийхээ ганц морийг алдчихлаа” гээд гүйж ирэхэд нь хулгайчийг өртөө хэрийн газарт айлын баруун орон дээр хэвтэж байна гэж хэлээд өвгөнийг тэр айлд очихыг зөвлөхөд нутгийн шилийн сайн эр бөөр нь татчихлаа гээд хэвтэж байсан” гэдэг. Аман ярианаас гадна "Алга болсон шарилуудыг газар илж, тэмтэрч байгаад олсон" гээд л сонин хэвлэлээр бичих нь ч энүүхэнд юм билээ. Ийм хачирхалтай ч гэмээр түүхтэй нэгэнтэй Улаанбаатарт ирээд байхад нь таарч цөөн хором хөөрөлдсөн юм.
-Сайхан өвөлжиж байна уу, та?
-Сайхаан, сайхан өвөлжиж байна уу. Энэ өвөл өнтэй сайхан болж улирч байна.
-Та өөрийгөө манай уншигчдад танилцуулахгүй юу. Ямаандага сахиусны эзэн, гүртэн гэдгээс эхлээд их сонирхолтой санагдаж байгаа байх?
-Би Баянхонгор аймгийн Баян-Овоо сумын харьяат. Нутагтаа 10 жилийн сургуулиа төгсөөд, Улаанбаатар хотод Соёл гэгээрлийн сургууль дүүргэж, нутаг буцан 30 гаруй жил соёлын ажил хийсэн хүн. Бага залуугаасаа л хүмүүсийн өвчин хуучийг нь бариа засал, энергийн аргаар эмчилдэг байлаа. 40 наснаас эхэлж, Ямаандага сахиустайгаа чанадаас холбогдож, нууц увидас маань илэрсэн. Тэрнээс хойш 14 жил чадахаараа л хүмүүст тусалж явна даа.
- Ямаандага сахиусны эзэн гэдэг нь ямар учиртай юм бэ?
-Чанадаас сахиустайгаа холбогдсоны дараа би Ямаандагын дүрээр оршдог юм. Тэр үед миний бүх бие соронзон хэлбэртэй болсон байдаг. Бүх л эд зүйлс биед наалдчихдгаас гадна жингүйдлийн байдалтай болдог. Түүнээс гадна сахиус маань "Ховч шар” судрийн хэлийг өгч, би мэдээллийг нь шууд уншдаг. Тэр үед маш хурдан ярьж эхэлдэг. Энэ бүхнээс ч болсон уу. Зоос татаж, бүх зүйлийг хардаг болсон. Өнгөрсөнд болсон, ирээдүйд болох зүйлс шууд л харагдана шүү дээ.
-Бөө нарын онгод бууж байгаатай ижил үйл явц болдог гэсэн үг үү?
-Бөөгийн шашнаас өөр. Шарын шашны сахиус буулгах л нэг зан үйл юм даа. Ямаандага сахиус маань манай ойрын хамаатан, багш минь болох Гүртэн Цэрэнгээс залагдаж ирсэн юм. Багш маань нутаг хошуундаа маш алдартай Гүртэн хүн байсан. Гүртэн гэдэг нь шарын шашны нэгэн цол л доо. Багшийг маань Баянхонгорчууд "Цагаан даадай” гэж авгайлдаг байсан юм. Би 4-7 дугаар анги хүртлээ багшийндаа амьдарч, эрдэм чадлаас нь суралцаж, нууц таринын аргад суралцсан хүн байгаа юм. Тэр бүх сурсан эрдэм маань хожим хойно 40 насанд илэрсэн нь ч учиртай гэж хувьдаа бодож, багшдаа их талархаж явдаг даа. Миний багш Баянхонгор аймгийн Баян-Овоо, Цахирын эрүү, Эрдэнэцогт, Хужирын гол, Хавтгай мод хавиар нутагладаг номтой хүн байсан юм.
-Утасны цаанаас ч асуудлыг олж хараад, зааж зөвлөөд явдаг гэх юм билээ. Энэ их сонин санагдаж байна. Тодорхой тайлбарлаж өгч болох уу?
-Нутгийнхан маань алдсан малынхаа сургийг гаргах гэж их ирдэг байсан юм. Тэгэхэд нь би мэргэлээд л олоод өгчихдөг байлаа. Сүүлдээ утсаар асуудаг болсон би ч яахав, зүг чигийг нь хэлээд л өгнө. Асуусан хүмүүс ч миний заасны дагуу яваад олчихдог юм билээ. Тэгээд л нэг мэдэх нь ээ зөвхөн Баянхонгор гэлтгүй бүх л газраас утасдаж, алдсан малынхаа сургийг гаргадаг болчихсон байсан. Алдсан мал маш олныг олж өгсөн дөө.
-Утсаар өөр асуудал асуух тохиолдол гарах юм уу?
-Тэгэлгүй яах вэ. Хүмүүс маш их залгаж, асуудаг. Би асуудлыг нь хараад, засал номыг нь ч хэлээд өгчихдөг юм. Утасны цаанаас ч увидас маань үйлчилдэг нь хүмүүсийн гайхшийг төрүүлдэг юм билээ.
-Тэгвэл та одоо ярилцлагыг маань уншаад сууж байгаа хүмүүст утасныхаа дугаарыг өгч болох уу?
-Бололгүй яах вэ. Би багшаасаа өвөлж авсан эрдэм чадлаараа аль болох олон хүнд тус хүргэх юмсан л гэж бодож явдаг хүн байгаа юм. Хот, хөдөө хоёрын хооронд л явж байдаг намайг Улаанбаатарт ирэхээр тус дэм хүргэсэн хүмүүс маань гэрийнхээ түлхүүрийг өгчихөөд "Санаа зоволтгүй шүү. Та энд гэртээ байгаа юм шиг л байж байгаад яв” гэж эрхлүүлдэг шүү дээ. Хүнд тустаи явна гэдэг ийм л сайхан буянтай ажил. Тиймээс би надад итгэж, тусламж гуйсан хүн бүхэнд чадахаараа туслахад бэлэн байдаг юм. Миний утасны дугаар 88118306, 88445909.
-Ярилцсанд баярлалаа. Танд эрүүл энхийг хүсье.
-Баярлалаа. Та бүхний ажил үйлсэд амжилт хүсье.