Нийслэлийн иргэдийн 86 хувь нь ядууралд өртжээ
Хүн амын тоо сая хүрсэн хотыг саятан гэж нэрлэдэг. Энэ жишгээр Улаанбаатар саятан хот болоод багагүй хугацаа өнгөрчээ. Гэтэл саятан хотын гэр хороололд амьдарч буй иргэдийн 86 хувь нь ядууралтай гэсэн шинэхэн судалгаа гарсан нь харамсалтай. Үүнийг өчигдөр болсон "Улаанбатар худалдан авалт 2016” уулзалтын үеэр хотын дарга хэлэв. Түүний өгүүлсэн энэ судалгаагаар 50 гаруй мянган иргэн ажилгүй болсон байна. Нэг өрхийг дунджаар гурван ам бүлтэй гэж тооцвол 150 мянган иргэн орлогын эх үүсвэрээ алджээ. Угтаа бол Монгол Улсын эдийн засаг өсч байгаа юу гэсэн асуултад учир мэдэх хэн бүтэн "Тийм” гэж хариулна. Гэвч 2010, 2011 онтой харьцуулахад байж болох хамгийн доод төвшиндөө ирсэн байна. Тухайн үед орж ирсэн хөрөнгө оруулалт наймдахин буурсан. Үүнийг дагаад бизнесийн үйл ажиллагаа хумигдсан. Албан байгууллагууд ажилчдаа цомхотгодог болсон. Цаашлаад томоохонсүлжээ дэлгүүрүүдийн борлуулалт 2011 онтой харьцуулахад 40 орчим хувиар буурсан тухай ч яриа бий. Гэтэл эсрэг талдаа валютын ханш өндөр цэгээ хадгалсан хэвээр. Энэ бүхний эцэст "Үүнээс цааш газар үгүй” гэдэг шиг нөхцөл байдал үүссэн байхад хотын удирдлагууд хувийн хэвшилдээ найр тавьж байна. Бүр нарийн тодорхойлбол хувийн хэвшилгүйгээр урагшаа явахгүй юм байна гэдгийг өнөө цагийн нийслэлийн удирдлагууд дөнгөж өнгөрсөн жилээс эхлэн ойлгосонд итгэхэд бэрх. Уг нь жижиг зах зээлтэй оронд аль эрт нэгдсэн ойлголцод хүрчих боломж хангалттай байсан. Гэвч гэр хорооллын айл өрхийн 14-хөн хувь нь боломжийн амьдралтайд тооцогдож байгаа хүнд үед хотын удирдлагууд тогтвортой байдал, итгэлцэл ярьсан нь хамгийн авууштай юм.
Сэтгэгдэл байхгүй байна.