МАН-ын Бага хурал урд шөнө өндөрлөжээ. Тус хурлаар сонгуульд оролцох мөрийн хөтөлбөр, сонгуульд нэр дэвшүүлэх журам зэргийг баталсан байна. Олны анхаарал татсан асуудал МАХН-тай сонгуульд эвсэж оролцох эсэх тухай байв. Хуралд МАН-ын зүгээс ажлын хэсгийг ахалж оролцсон УИХ-ын гишүүн Ч.Хүрэлбаатар хэдэн сарын турш хэлэлцэж, МАН, МАХН хамтрахаар болсон тухай мэдээлжээ. МАХН-ын ажлын хэсгийн ахлагч УИХ-ын гишүүн Ч.Улааны хамт хэвлэлийн бага хурал ч хийлгэсэн. Ингэхдээ хоёр нам 51*25-ын харьцаагаар 76 тойрогт нэр дэвшүүлэхээр тохирч, эвслийн Удирдах зөвлөл, даргаа сонгосон санамж бичигт гарын үсэг зураад байжээ.

Гэтэл МАН-ын Бага хурал хуралдаж байх явцад МАХН тохирооноосоо буцаж, дахин шинэ болзлууд тулгажээ. Энэ нь аймаг нийслэлийн ИТХ-ын сонгуульд 20*80-ын харьцаагаар нэр дэвшүүлэх, тухайн орон нутгийн сонгуульд ялсан тохиолдолд ИТХ, аймгийн Засаг даргыг хоёр намаас сөөлжүүлж тавих болзол байжээ.

МАХН-ын шинэ болзлыг МАН хүлээж авах боломжгүй гэсэн байна.Тэгээд ч санамж бичигт гарын үсэг зураад дөрөв хоноогүй байж мурьж байгаа улстай дөрвөн жил хамтран ажиллахад хүнд гэж МАН-ын дарга М.Энхболд Бага хурал дээрээ ярьжээ.

Өчигдөр орой 21 цагийн үед МАХН-ын дарга Н.Энхбаяр МАН-ын ажлын хэсгийнхэнтэй дахиж уулжээ. МАН-ын эвсэх боломжгүй болсон саналыг сонсоод Н.Энхбаяр болзол нөхцөлөө бууруулж, уйлан гуйсан гэх яриа байна. 

Г.Гэрэл