УИХ-аар өчигдөр Сонгуулийн тухай хуульд өөрчлөлт оруулж, жижиг 76 тойрогтоо байх хувилбарыг баталсан. Ингэснээр намын жагсаалт үгүй болж, жижиг 76 тойрогт намууд нэр дэвшигчдээ дэвшүүлэх юм. Ардчилсан намын дүүргийн намын хороод хуралдаж байгаа аж. Харин маргааш бүлэг нь өргөтгөсөн хуралдаан хийж, тойргоо хуваарилах бололтой. МАН болон МАХН-ын хувьд ч мөн адил. Жижиг 76 тойрогт намаасаа хэнийг нэр дэвшүүлэх вэ, аль тойрогт хэнийг явуулах уу гэхчлэн олон асуудал нам дотор, нэр дэвшигчид дунд өрнөж буй. Өнөөдөр УИХ-ын чуулган үдээс өмнө хуралдах байсан ч, хуралдаагүй. Энэ нь намууд дотроо тойргоо хуваарилж буйтай холбоотой биз ээ.

Энэ амралтын өдрүүдэд намууд УИХ болон нийслэлд нэр дэвших, аль тойрогт хэн нэр дэвших вэ гэсэн асуудлыг шийдвэрлэх нь. Нийслэлийн хувьд энэ сарын 9-нд ирэх даваа гарагт нэр дэвшигчдийнхээ нэрсийг тодорхой болгох учиртай. Харин УИХ-ын тухайд энэ сарын 23 гэхэд нэр дэвшигчид тодорхой болно гэж УИХ-ын дарга З.Энхболд хэлсэн.

Ямартай ч энэ амралтын өдрүүдэд сонгуульд оролцох нам, эвслүүд завгүй байх нь. Тэд өнөөдрөөс эхлээд тойрог хуваарилах ажилдаа ханцуй шамлан орлоо.   

М.Төр