"Аль-Шабааб” бүлэглэл Сомалийн нийслэл Могадишу хотын зочид буудалд террорист халдлага үйлдсэний улмаас наад зах нь 10 хүн амиа алдаж, 25 хүн шархадсан байна.

 

Амиа золиослогч нэгэн этгээд "Амбассадор” зочид буудлын үүдэнд бөмбөг дэлбэлсний дараа араас нь буутай этгээдүүд зочид буудал руу дайран орсон байна.

Энгийн 10 иргэн амиа алдаж, 25 хүн шархадсан гэж цагдаагийн ажилтан Мохамед Фарах мэдэгдэв.

Гэрчийн мэдүүлснээр, зочид буудалд хүчтэй дэлбэрэлт болсны дараа буун дуу гарчээ. Харин зочид буудлын орчимд амьдардаг оршин суугчдын ярьснаар, цэргүүд зочид буудал дотор барьцаалагдсан хүмүүсийг аврахаар оролдож байна.

Уг халдлагын хариуцлагыг "Аль-Шабааб” бүлэглэл өөртөө хүлээжээ.

Хөл хөдөлгөөн ихтэй Мекка Аль-Мукаррам гудамжинд байрладаг "Амбассадор” зочид буудлаар Засгийн газрын албаны хүмүүс байнга үйлчлүүлдэг аж.

"Аль-Шабааб” бүлэглэл нь Сомалийн Засгийн газрын эсрэг олон жилийн турш зэвсэглэн тэмцэж байгаа бөгөөд иймэрхүү террорист халдлагыг байнга үйлддэг байна.