Аливаа дарамт шахалтаас ангид бөгөөд бодитой мэдээлэл түгээхийг В.Путин уриаллаа
ОХУ-ын Ерөнхийлөгч В.Путин "Сэтгүүлзүйн шинэ үе: Хуучин урсгалыг халах нь” сэдэвт олон улсын чуулга уулзалтад оролцон үг хэлэхдээ "мэдээлэл нь бүх талаас нь харахад бодитой бөгөөд аливаа нэгэн дарамт шахалтаас ангид байх ёстой" гэжээ.
Мэдээллийн технологи асар хурдацтай хөгжиж буй өнөө үед мэдээлэл болон түүний үнэн бодит байдал хамгийн чухал зүйл мөн гэж В.Путин мэдэгджээ.
"Россия Сегодня" агентлагийн зохион байгуулсан тус чуулга уулзалтын төгсгөлийн хуралдаанд В.Путин оролцон үг хэлсэн юм.
Тус форумыг зохион байгуулж буй "Россия Сегодня"-гийн сэтгүүлчдэд хандан В.Путин хэлэхдээ, 1941 оны зургадугаар сард Аугаа их Эх орны дайн эхлэх үед байгуулагдсан Зөвлөлтийн Мэдээлэх товчооны (SovInformBuro) ажлыг үргэлжлүүлж байгаад нь тэдэнд баяр хүргээд "би та бүхнийг Орос улс дахь мэдээллийн салбарын тэргүүлэгчид хэвээрээ байж, олон сонсогч, үзэгч, уншигчидтай байхыг хүсэн ерөөе” гэжээ.
ОХУ-аас гадна нийт 30 орноос ирсэн олон улсын хэвлэл мэдээллийн байгууллагуудын удирдагчид, төлөөлөгчид оролцсон уг форум нь үнэн бодит мэдээлэл түгээдэг мэргэжлийн сэтгүүл зүйг хөгжүүлэх боломж болон бэрхшээлүүдийн талаар тунгаан ярилцах боломж олгосон цугларалт байлаа.
"Россия Сегодня”, "Xinhua” (Хятад), "Prensa Latina” (Куба), "SANA” (Сири) болон "Tanjug” (Серб) зэрэг мэдээллийн агентлагууд чуулга уулзалтад оролцжээ.
Сэтгэгдэл байхгүй байна.