Монголын эрүүл мэндийн салбарт будаг нь ханхалсан зуу зуун эмч, эмнэлгийн ажилтнууд хөл тавиад багагүй хугацаа өнгөрлөө. Тодруулбал, энэ хавар анагаахын сургуулиудыг маш олон оюутан төгсөж, дипломоо өвөртөлсөн. 

Одоо тэдний толгойд ганцхан бодол эргэлдэж байгаа. Тэр нь "Хаана, яаж ажилд орох вэ”. Жил бүрийн элсэлтийн шалгалтаар сурагчид Анагаахын сургуулийг зүглэж, жил бүрийн төгсөлтийн баяраар шинэхэн эмч нар зуу зуугаараа эрүүл мэндийн салбарт хөл тавьж, энэ асуудалтай нүүр тулдаг нь нууц биш.

Энэ жилийн хувьд энэ асуудал бүр ч хүндэрсэн. Зөвхөн сүүлийн нэг жилийн хугацаанд л гэхэд сайд нь хээл хахуулийн хэрэгт холбогдон ажлаа өгснөөр тус салбар 7 сар гаруй хугацаанд сайдгүй явсан. Үүнээс болж өнөөдөр эрүүл мэндийн салбар нь уналтад орчихсон шинэ төгсөгчидөө хүлээж авах ажлын байр нь ч ховордчихсон байгаа. Дээрээс нь энэ сарын 3-наас хэрэгжиж эхэлсэн Эмнэлгийн тусламж, үйлчилгээний тухай хууль тэднийг арай гэж олдсон ажлаа хийх боломжгүйд хүргэж байна. Тодруулбал, тус хуулинд, шинэ төгсөгчид хоёр жил резидент эмчээр ажиллаад дараа нь лицензийн шалгалтаа өгнө гэж хуульчилсан бөгөөд энэ нь энэ сарын 3-наас эхлэн хэрэгжиж эхэлсэн аж. Харин энэ жилийн төгсөгчид өнгөрсөн тавдугаар сарын 30, 31-нд лицензийн шалгалтаа өгсөн. Тэгэхээр тэдний асуудал аль хуулиар нь зохицуулагдах нь мэдэгдэхгүй, ойлгомжгүй нөхцөл байдал үүсээд байгаа юм.

Үүнтэй холбогдуулан, нэгэн сургуулийн оюутнууд манай сайтад хандаж, "Лицензийн шалгалтад тэнцсэн хүүхдүүдэд ямар лиценз хэзээ өгөхийг” тодруулж өгөхийг хүссэн юм.

Энэ талаар ЭМСЯ-ны эмнэлгийн тусламжийн хэлтсийн дарга Л.Зэндмаагаас тодруулахад, "Энэ сарын 3-наас Эмнэлгийн тусламж, үйлчилгээний тухай шинэчилсэн хууль хэрэгжиж эхэлсэн. Тиймээс энэ жилийн төгсөгчдөд ямар лиценз, хэзээ өгөх нь одоогоор тодорхойгүй байгаа. Бидэнд ирэх наймдугаар сарын 1-нээс өмнө журам гаргаж энэ асуудлыг шийдвэрлэх үүрэг өгсөн. Тиймээс ирэх наймдугаар сарын 1 гэхэд бүх асуудал шийдэгдэнэ” гэсэн юм.

Тэгэхээр, шинэ халаадтай, шижигнэсэн эмч нар маань ирэх наймдугаар сар хүртэл ажилд орох талаар мөрөөдөөд ч хэрэггүй болж байгаа юм.

Т.Гэрэл