Монгол Улсын Ерөнхий сайдыг огцруулах саналыг өнөөдөр /2025.10.13/ үргэлжлүүлэн хэлэлцэнэ. 

УИХ-ын гишүүн, ТББХ-ны дарга Ц.Сандаг-Очир:

-Төрийн байгуулалтын байнгын хорооны хуралд 11.30 цаг гэхэд тав, зургаахан гишүүн ирсэн байна. Ардчилсан намын бүлэг хуралдаж дуусаагүй байгаа юм байна. МАН, ХҮН, Үндэсний эвсэл гээд бүх гишүүн үнэхээр хариуцлагагүй байна. Чухал асуудал хэлэлцэх гэж байхад 5, 6-хан гишүүн ирчихсэн байдаг. Хэнийг нь хэн гэлтгүй. Төрийн ажлыг гацааж, тээг саад болж байна. Бид 30 минут хүлээлээ. Төрийг ажлыг бойкотлож болохгүй. Үндсэн хуулиар заасан хугацаатай ажил. Та бүхнийг ард түмэн харж байгаа шүү. УИХ-ын гишүүн Б.Хэрлэн, С.Бямбацогт, Ц.Даваасүрэн, Х.Зулпхар, М.Бадамсүрэн нар ирсэн бол байнгын хорооны бус гишүүдээс УИХ-ын дарга Д.Амарбаясгалан, П.Сайнзориг, Б.Жавхлан нар ирсэн байна. Харин УИХ-ын гишүүн Н.Номтойбаяр, О.Алтангэрэл хоёр албан ёсны гадаад томилолттой байгаа учраас ирцнээс хассан. Тэглээ гээд ирц хангалттай байгаа. Ирц 20 гишүүнээс эхэлж байгаа. Ардчилсан нам, ХҮН намаас нэг ч хүн орж ирээгүй байна. Бид 35 минут хүлээлээ. УИХ-ын гишүүд ирэхгүй байгаа учраас өнөөдрийн ТББХ-ны хуралдааныг хаалаа. Жич, хуралдааны товыг тогтоож, зар хүргэж хуралдааныг хуралдуулна. Хэлэлцэх асуудал хэвээрээ, хуралдааныг хаалаа.