Засгийн газар өчигдөр /2025.10.09/ өмнөх Засгийн газрын улсын нууцад авсан байсан нүүрсний гэрээнүүдийг ил болгосон нь Х.Баттулга ба түүний багийнхны бас нэгэн үнэн төрийг илчилсэн үйл явдал болж хувирч байна.

Улсын нууцад авсан байсан нүүрсний 39 гэрээнээс 31 нь "Бодь” группэд хамаарч байгаа юм. Энэхүү нууц гэрээнд туссанаар "Бодь групп” дангаараа 22.5 сая тонн нүүрсний гэрээ байгуулснаас 8.2 сая тонныг нь өмнөд хөрш рүү экспортолсон байна. Нүүрсийг нэг тонныг нь 200 ам.доллараар борлуулсан гэж бодвол 1.6 тэрбум долларыг аль хэдийнэ халаасалсан байна. Гэтэл барьсан төмөр зам нь мухар. Монголын ард түмнийг ингэж доромжлох эрх хэнд байна гэж эдийн засагч Р.Даваадорж нүүр номоороо дамжуулан бухимдлаа илэрхийлэв. Мөн "Нүүрсний нууц гэрээнээс харвал Монгол Улс эдийн засгийн тусгаар тогтнолоо аль хэдийн алджээ. Нийт 39 гэрээ ил болжээ. Арай ч дээ. 2019-2022 онуудад хийсэн гэрээнүүд. Сая сая тонноор нууцалж байгаад гаргаж байж дээ. Үүнээс 26-г нь нүүрсний үнэ дэлхийн зах зээл дээр 600 ам.доллар хүрч байсан 2022 онд хийжээ" гэж тодотгосон юм.

"Бодь” группын эзэн нь Д.Баясгалан. Д.Баясгалан нь УИХ-ын гишүүн Х.Баттулгыг Ерөнхийлөгчийн алба хаших хугацаанд хамгийн их ойр нөхөрлөж, улмаар Засгийн газраар дамжуулан нүүрсний экспортын төмөр зам барих шийдвэрийг гаргуулж байв.

Энэ шийдвэрийг Л.Оюун-Эрдэнийн Засгийн газар гаргасан. Гэвч асар их хөрөнгө гаргаж бариулсан төмөр зам мухар болж, таарсан. Одоо тэгтэл араас нь нүүрсний асар өндөр дүнтэй оффтейк гэрээ нь ил болж байна.

УИХ-ын гишүүн Х.Баттулга ба түүний багийнхан Л.Оюун-Эрдэнийн Засгийн газрыг унагахгүйн төлөө байдаг чадлаараа зүтгэсний бас нэг утга учир нь нүүрсний оффтейк гэрээтэй холбоотой байж болзошгүй болж байна.

Мөн Г.Занданшатарын танхимыг унагах ажиллагаанд Х.Баттулга ба түүний багийнхан оройлон оролцох болсон. Учир нь, Ерөнхий сайд Г.Занданшатарыг огцруулахыг дэмжиж байгаа УИХ дахь Ардчилсан намын бүлгийн гишүүдийн олонхи нь Х.Баттулга гишүүний талынхнаас бүрдсэн. Энэ танхим унавал Х.Баттулга дагуулаад хамаарал бүхий Засгийн газраа байгуулна гэдэг яриа саарал ордонд түгэх болсон нь нүүрсний оффтейк гэрээнээс гадна дахиад асар олон нууц бизнесийн гэрээ байгаа юм биш биз гэх хардлагад ч хөтөлж эхэлж байна.

УИХ-ын Төрийн байгуулалтын байнгын хорооны маргаашийн хуралдаанаар Ерөнхий сайд Г.Занданшатарыг огцруулах эсэх саналыг хэлэлцэнэ. Үүний дараа УИХ-ын чуулганаар асуудлыг хэлэлцэж эцсийн шийдвэр гарах учиртай.

УИХ-ын чуулганаа тасалж, өвөлжин, хаваржин хөдөөгүүр давхисан УИХ-ын гишүүн Х.Баттулга ойрмогхоноос Төрийн ордноос салахаа больж, шинэ Засгийн газарт анхаарал хандуулах болсон нь дахиад хамаарал бүхий Засгийн газраа байгуулахад анхаарч байж мэдэх нь. Тэрбээр өнгөрсөн жилүүдэд  "Бодь" группын Д.Баясгалантай хамтран Л.Оюун-Эрдэнийн Засгийн газраар дамжуулж нүүрсний асар олон оффтейк гэрээ байгуулсан нь улсын нууцаас гаргасан гэрээнээс харж байна. Харин тэр шинэ танхимыг хамаарал бүхий этгээдээрээ дамжуулан дахин байгуулбал бас л улсын нууц нэрээр бизнесийн гэрээнүүдийг далдалж, хулгайгаа хийхийг байг гэх газаргүй л юм.

Ардын намын гишүүд Засгийн газраа унагах гэж Төрийн ордонд хор найруулж гүйхийн оронд Х.Баттулга ба түүний багийнхны нүүрсний оффтейк гэрээгээр дамжуулан ямар их ажил амжуулсныг нягталж шалгахад анхаарахгүй бол мөдхөн тархин дээр чинь цахиур хагалж мэдэх нь ээ.

Г.ХОРОЛ