НҮБ-ын гишүүн орнуудын төлөөлөгчид тус байгууллагад суугаа  Фижи улсын байнгын төлөөлөгчийг Ерөнхий Ассамблейн дараагийн ерөнхийлөгчөөр сонгожээ.

 

Даваа гарагт явуулсан санал хураалтаар Петер Томсон олонхын санал авсан байна. Тэрбээр ирэх есдүгээр сард эхлэх Ерөнхий Ассамблейн 71 дүгээр чуулганы ерөнхийлөгчөөр нэг жилийн хугацаанд ажиллана.

Байнгын төлөөлөгч Томсон дэлхийн дулаарлын эсрэг олон улсын шинжтэй арга хэмжээнүүдийг санаачлан боловсруулахад оролцож байжээ.

Номхон далайн өмнөд хэсгийн Фижи болон бусад улсад дэлхийн дулаарлаас үүдэлтэй цаг агаарын гамшгийн аюул байнга заналхийлж, далайн усны түвшин дээшилсээр байгаа юм.

НҮБ 2030 он гэхэд Тогтвортой хөгжлийн зорилтод хүрэхээр чармайж байгаа учир Томсоны хувьд нэлээд сорилттой тулгарч магадгүй. Өнгөрсөн онд НҮБ 17 зорилт, тэдгээрийн дотор уур амьсгалын өөрчлөлттэй тэмцэх арга хэмжээнүүдийг баталсан юм.

Тогтвортой хөгжлийн зорилтуудыг хэрэгжүүлэхийн төлөө шаргуу ажиллахаа Томсон илэрхийлээд "хэрвээ намайг энэ албан тушаалд байх хугацаанд НҮБ-ын ажил дорвитой урагшлахгүй бол би алдаагаа шүүн тунгаах болно” гэжээ.